रुख जोगाउन अष्ट्रेलियामा ढुंगाबाट कागज, मुख्य ग्राहक अमेरिकामा, कागज यस्तो छ !
प्रकाशित मिति : कार्तिक ३०, २०७६ शनिबार
ढुंगाबाट बनाइने कागज बनाउँदा तयार पारिएको कागजको ठूलो रोल ।
के रुखविना पनि कागज बनाउन सम्भव छ ? यो प्रश्नको जवाफ अहिले भेटिएको छ । अष्ट्रेलियन व्यवसायीहरु केभिन ग्रासिया र जोन शीले सम्भावित वैकल्पिक कच्चापदार्थबारे गरेको सोधमा ढुंगाबाट कागज बनाउन सकिने पत्ता लगाएका हुन् ।
एउटा ताइवानको कम्पनीले ढुंगाबाट कागज बनाएको थाहा पाएपछि उनीहरुले त्यहीबाट प्रेरित भएर अगाडि बढे । तयसपछि उनीहरुले सन् २०१७ को जुलाईमा ढुंगाबाट कागज बनाउन सुरु गरे ।
यो मेसिनले काठ, पानी र खराब रसायनहरुको प्रयोग नगरी कागज उत्पादन गर्दै आएको छ । निर्माण स्थल र औद्योगिक डम्प साइटहरु खनेर निकालिएको ढुंगाको कचराबाट नै कागज बनाउन सकिन्छ ।
परम्परागत रुपमा हेर्ने हो भने कागज उत्पादनका लागि काठ काटेर, त्यसका रसायन, ब्लीच र प्रसस्त पानी हालेर घोल बनाइन्छ । त्यसपछि निचोरेर, सुकाएर र कागजको रुपमा सपाट बनाइन्छ । जसका कारण श्रममात्र बढी लाग्दैन, बनमास्दा कार्वन उत्र्सजन समेत बढ्छ ।
हाल कागजउद्योगहरुले ४० प्रतिशत औद्योगिक काठको प्रयोग गर्दै आएका छन् । तर अष्ट्रेलियन व्यवसायीहरु केभिन ग्रासिया र जोन शीले सिड्नीमा स्थापना गरेको ढुंगाबाट कागज बनाउने उद्योगले बनविनाशलाई कम गर्ने अपेक्षा गरिएको छ ।
सन् २०१९ मा मात्र यो उद्योगबाट ढुंगाबाट कागज उत्पादन गर्दा ५४० ठूला रुखहरु काटिनबाट जोगिएका थिए । जसका कारण झण्डै २५ हजार किलो कार्वन उत्सर्जन हुन पाएन ।
कागज उत्पादनका लागि उनीहरुले फ्याकिएका चुनढुंगाको उपयोग गर्दै आएका छन् । यसबाट उत्पादन हुने कागज नोटबुकको कागजजत्तिको पातलो बनाउन सम्भव छ । ढुंगाबाट बनाइएको कागज वाटरपु्रफ हुनुका साथै च्यात्न कठिन हुने र रिसाइकल गर्न सकिने खालको छ ।
यसबाट बनेका नोटबुकहरु अष्ट्रेलियामा १० देखि २५ डलरमा साइज अनुशार बिक्रि भइरहेका छन् । सुरुमा कम्पनीको वेवसाइटबाटमात्र यो कागज विक्रि गरिएको भएपनि अहिले १ सय स्टोरमा किन्न सकिन्छ । अष्ट्रेलिया, अमेरिका र बेलायतमा अहिले यो कागज बिक्री भइरहेको छ ।
यो कागजका ७० प्रतिशत क्रेताहरु अमेरिकामा रहनेहरु छन् । यो बर्षको अन्तयसम्ममा उनीहरुले विश्वभर १ हजार स्टोरहरु खोल्ने योजना बनाएका छन् ।