काठमाडौँमा ‘अकुपाइ टुँडिखेल’ अभियान सुरु, खुल्लामञ्चको चारै तर्फबाट मानवसाङ्लो
प्रकाशित मिति : कार्तिक २३, २०७६ शनिबार
काठमाडौँमा ‘अकुपाइ टुँडिखेल’ अभियान सुरु भएको छ ।
शनिबार बिहान खुल्लामञ्चको चारै तर्फबाट मानवसाङ्लो बनाएर विरोधको अभियान सुरु गरिएको हो ।
कार्यक्रममा विभिन्न राजनीतिक दलका नेता कार्यकर्ता, कलाकार, स्थानीय नागरिक, सामाजिक अभियन्ता लगायतका व्यक्तिको सहभागिता थियो ।
भूकम्पपछि अस्थाई रुपमा प्रयोग गर्ने गरि खुलामंचको केही भाग विभिन्न संघ संस्थालाई दिइएकोमा अहिले स्थाइ प्रकृतिका संरचना बन्न थाले पछि बिरोध हुँदै आएको छ ।
यसरी खुलामंच अरुको कब्जामा जान थालेको भन्दै अभियन्ताहरुले आजबाट अभियान सुरु गरिएको बताएका छन् ।
अभियानमा पूर्व प्रधानमन्त्री बाबुराम भट्टराई, नेपाली कांग्रेसका नेता तथा सांसद भीमसेनदास प्रधान, सांसद गगन थापा, प्रदेश ३ का सांसद विराजभक्त श्रेष्ठ, काठमाडौं महानगरपालिकाकी उपप्रमुख हरिप्रभा खड्गी श्रेष्ठलगायत पूर्वराजदूत हिरण्यलाल श्रेष्ठ, शिक्षाविद् केदारभक्त माथेमा, टिभी कार्यक्रम प्रस्तोता रवि लामिछाने लगायतकाको सहभागिता थियो ।
खुलामंचलाई अतिक्रमणबाट बचाउन तीन महिनासम्म प्रत्येक शनिबार यस्तो कार्यक्रम संचालन गर्ने बताइएको छ । खुलामंचमा बीर अस्पतालको स्टोररुमदेखि निर्माण सामग्री राख्ने गाडी पार्किङ्ग गर्ने गरिएको छ ।
यस्तै पुरानो बसपार्कमा भ्यू टावर बनाउने भएपछि अस्थायी रुपमा शहरी बसपार्क पनि खुलामंचमा राखिएको छ । त्यस्तै अनधिकृत रुपमा पार्किङ गर्ने र विभिन्न बहानामा जमिनमा ढलान गर्ने कामसमेत भएपछि त्यसको चौतर्फी विरोध हुँदै आएको छ ।
