फेसबुकले गरिबका २० हजार घर बनाउन १ अर्ब डलर खर्चिने
प्रकाशित मिति : कार्तिक ५, २०७६ मंगलबार
फेसबुकले अमेरिकाको क्यालिफोर्नियामा गरिबका घर बनाउन १ अर्ब डलर खचिर्ने भएको छ । उक्त रकम गरिबहरुका सस्तो घर निर्माण गर्न सहयोग, ऋण र जमिनका लागि खर्चिने फेसबुकले जनाएको छ ।
अमेरिकाको क्यालिफोर्नियामा सस्तो आवास संकट भइरहेकाले त्यसलाई कम गर्न क्यालिफोर्नियाका गर्भनर गेभिन न्युजोम र क्यालिफोर्निया राज्यसँगको सहकार्यमा फेसबुकले उक्त सहयोगको घोषणा गरेको हो । सहयोगबाट २० हजार घर निर्माणमा योगदान पुग्ने जनाइएको छ ।
आर्थिक असमानता भएका परिवारलाई सघाउनका लागि सस्ता आवासमा पहुच आवश्यक भएको त्यहाँका गभर्नरले जनाएका छन् । फेसबुकले १० बर्षको अवधिमा उक्त रकम प्रदान गर्ने जनाइएको छ ।
क्यालिफोर्नियाका सान फ्रान्सिस्को लगायतका क्षेत्रमा घरवारविहिनहरुको समस्या बढ्दै गएकाले सरकारले फेसबुकसँगको सहकार्यमा यो योजना अगाडि सारेको हो । १ अर्ब डलरमध्ये २५ करोड डलर मिश्रित आम्दानी भएकाहरुलाई राज्यका जमिनमा आवास निर्माणमा खर्च गरिनेछ ।
त्यस्तै १५ करोड डलर सान फ्रान्सिस्कोमा घरवारविहिनका लागि आवास र सस्तो आवास निर्माण खर्च गरिने भएको छ । त्यस्तै २२ करोड डलर फेसबुकले हालै किनेको मेन्लो पार्कमा रहेको जग्गामा १५ सय घर निर्माणमा खर्च गरिनेछ ।
सान माटियो र सान्ता क्लारामा विद्यालय क्षेत्र र सार्वजनिक जमिनमा शिक्षक र अत्यावश्यक कामदारका लागि घर बनाउन साढे २ करोड डलर खर्च गरिनेछ । गत जुन महिनामा बे एरियामा आवास संकटबिरुद्ध लड्न गुगलले १ बिलियन डलर सहयोगको घोषणा गरेको थियो ।