सेप्टेम्बर १४ मा २३ हजार किलोमिटर प्रतिघण्टाको गतिमा छुद्रग्रह पृथ्वीनजिक
प्रकाशित मिति : भाद्र १५, २०७६ आईतबार
सेप्टेम्बर १४ मा २३ हजार किलोमिटर प्रतिघण्टाको गतिमा बुर्ज खलिफा जत्तिकै आकारको एउटा छुद्रग्रह पृथ्वीनजिक भएर गुज्रने भएको छ । २००० क्वु डब्ल्यु सेभेन नामको उक्त छुद्रग्रह पृथ्वीमा ठोक्किने खतरा भने नरहेको जनाइएको छ ।
२४ घण्टाको अन्तरालमा अर्को छुद्रग्रहपनि पृथ्वीको नजिक भएर जाने जनाइएको छ । दुईवटामध्ये पृथ्वीको नजिक भएर जानेमा २००० क्वु डब्ल्यु सेभेन पहिलो छुद्रग्रह हुनेछ । उक्त छुद्रग्रह पृथ्वीबाट ५ दशमलव ३ मिलियन किलोमिटर नजिक आउनेछ ।
गत अगस्त १० मा पनि एम्पायर स्टेट भवन भन्दा ठूलो छुद्रग्रह पृथ्वी नजिकैबाट विना क्षति गएको थियो । १८७० फिट परिधि रहेको २००६ क्युक्यु २३ नामको उक्त छुद्रग्रह पृथ्वीमा ठोक्किएको भए एउटा सिंगै देशजति क्षेत्रमा क्षति पुग्ने अनुमान गरिएको थियो ।
पृथ्वीको नजिकै भएर गएको उक्त छुद्रग्रह पृथ्वीको सतहमा बिष्फोट भएको भए अमेरिकाको एउटा राज्यजति वा एउटा सानो देशजति क्षेत्रमा क्षति पुग्ने अनुमान नासाले गरेको थियो ।
सौर्यमण्डलमा १ किलोमिटरभन्दा ठूलो परिधि भएका झण्डै ९ सय छुद्रग्रहहरु रहेको जनाइएको छ । सन् २०१३ मा ५५ फिट परिधिको छुद्रग्रह पृथ्वीको सतहमा विष्फोट हुँदा रसियामा झण्डै १ हजार जना घाइते भएका थिए । त्यतीबेला रसियामा ६६ फिट गहिरो खाडल परेको थियो ।
करोडौं बर्ष पहिलो पृथ्वीमा १० किलोमिटर परिधिको एउटा छुद्रग्रह ठोक्किदा डायनोशर लगायतका प्रजातीहरु लोप भएका थिए । सन् २०१२ मा पनि बसको आकारको एउटा छुद्र ग्रह पृथ्वीको नजिकबाट गोलीको गतिभन्दा १० गुणा छिटो गएको थियो । गत जुलाई १९ मा पनि एउटा छुद्रग्रह पृथ्वीको नजिकबाट गएको थियो ।
यदि त्यस्ता छुद्रग्रहहरु पृथ्वीतिर ठोक्किन आइपुगेको खण्डमा पनि नासासँग त्यसको बाटो परिवर्तन गर्ने साधनश्रोत रहेको छ । नासाले त्यस्ता छुद्रग्रह पृथ्वीतिर आउदै गरे नगरेकोबारे प्रसस्त जानकारी राख्ने र त्यसबारे चेतावनी संकलन गर्ने समेत गर्दै आएको छ ।