श्रीलंका बिष्फोटमा कैयन अमेरिकन मारिएको अमेरिकी विदेशमन्त्रीबाट जानकारी, संख्याबारे मौन
प्रकाशित मिति : बैशाख ८, २०७६ आईतबार
श्रीलंकाका चर्च र होटलमा भएको आत्मघाती हमलामा कैयन अमेरिकनको समेत मृत्यु भएको अमेरिकी विदेशमन्त्री माइक पम्पिओले वक्तब्य मार्फत जनाएका छन् । तर उनले कतिजना अमेरिकनहरु मारिएको भन्नेबारे केही बताएका छैनन् ।
इस्टर प्रभातको बेलामा भएको आतंककारी हमलाको अमेरिकी विदेशमन्त्रीले निन्दा गरेका छन् । अमेरिकी दूतावासले आक्रमणबाट प्रभावितहरुको सहयोगका लागि काम गरिरहेको जनाइएको छ ।
अहिलेसम्म ८ देशका १४ जना विदेशीहरु मारिएको पुष्टी भइसकेको छ । मृत्यु हुने विदेशीहरुमा २ जना अमेरिका र बेलायतको दोहोरो नागरिकता भएका सहित ५ जना बेलायतीहरु, ३ जना भारतीय, २ जना चिनिया, २ जना टर्किस, १ जना डच र एकजना पोर्चुगिज रहेको पुष्टी भएको छ ।
अहिलेसम्म मृत्यु हुनेको संख्या २ सय नाघेको छ । आक्रमणमा कम्तीमा चारसय ५० जना घाइते भएका छन् ।
विहान झण्डै पौने नौ बजे कोलम्बो, नेगोम्बो र बाटिकालोआमा तीनवटा चर्चमा बिष्फोट गराइएको थियो । आक्रमणकारीले तीनवटा होटल र बैंकट हलमा पनि बम हमला गरेका थिए । आठौं बिष्फोट सिटीमा रहेको फ्लाइओभर मुनीको घरमा भएको थियो ।
विहान पौने ९ बजेदेखि साढे ९ बजेसम्म आत्मघाती हमलाकारीहरुले आक्रमण गरेका थिए । बौद्धधर्मालम्बीहरुको बाहुल्य रहेको श्रीलंकामा हिन्दु, मुस्लिम र क्रिस्चियन समेत रहदै आएका छन् ।
