६ सांसदसहित आम नरसंहार गर्ने योजना बनाएको भन्दै अमेरिकी सेनाका लेफ्टिनेन्ट पक्राउ
प्रकाशित मिति : फाल्गुन ९, २०७५ बिहीबार
आम नरसंहारको योजना बनाएको योजनामा अमेरिकी सेनाका लेफ्टिनेन्टलाई हातहतियार र लागुऔषतको अभियोगमा पक्राउ गरिएको छ । मेरिल्याण्ड सिल्भर स्प्रींगका ४९ बर्षीय क्रिस्टोफर पल हसन अमेरिकी कोस्ट गार्डमा लेफ्टिनेन्ट रहेका थिए ।
श्वेत सर्बोच्चताको पक्षधर उनको नरसंहारको सुचीमा कैयन उच्चपदस्थ डेमोक्र्याट्सहरु रहेको अभियोग लगाइएको छ । सीएनएन र एमएसएनबीसीका पत्रकारहरु समेत उनको सुचीमा रहेको जनाइएको छ ।
न्युयोर्ककी डेमोक्रेटिक सांसद अलेक्जेण्ड्रीया ओकासियो कोर्टेज, न्युयोर्क सिनेटर चक शुमर, न्युजर्सीका कोरी बुकर, कनेक्टिकटका रिचार्ड ब्लुमेन्थल, क्यालिफोर्नियाकी कमला ह्यारिस, टेक्सासका सांसद बेटो राउर्के, सीएनएन पत्रकार डोन लेमन, क्रिस कुमो, भान जोन्स, एमएसएनबीसीका पत्रकार क्रिस हायस, अरी मेल्बर, जो स्कारबोरो लगायतमाथि आक्रमणको योजना बनाएको अभियोग लगाइएको छ ।
हसनले अतिबादी र श्वेत सर्बोच्चताको विचारलाई पक्षपोषण गर्नुका साथै ७७ जनाको हत्या गर्ने गरी आतंकवादी हमलामा दोषी पाइएका एकजना नर्वेजिएनको घोषणालाई समर्थन गरेको अदालती कागजातमा दावी गरिएको छ । हसनले आक्रमणको लागि आफूलाई तयार पार्न मानव विकाशित हर्मोन भण्डारण गरेर राखेको समेत सरकारी आरोप छ ।
अदालती कागजातमा हसनलाई घरेलु आतंकवादी रहेको आरोप लगाइएको छ । वासिंटनको कोस्ट गार्ड मुख्यालयमा सकृय ड्युटीमा रहेका हसन पूर्व मरिन समेत रहेको जनाइएको छ ।