अमेरिकाका १६ राज्यबाट ट्रम्पको संकटकालबिरुद्ध मुद्दा दायर
प्रकाशित मिति : फाल्गुन ७, २०७५ मंगलबार
अमेरिकाका १६ राज्यले राष्ट्रपति डोनाल्ड ट्रम्पले घोषणा गरेको संकटकालबिरुद्ध अदालतमा मुद्दा दायर गरेका छन् । सोमबार साँझ नर्दन डिस्ट्रिक्ट अफ क्यालिफोर्नियामा मुद्दा दायर गरिएको हो ।
१६ राज्यको नेतृत्व गर्दै क्यालिफोर्नियाका महान्यायाधिवक्ता जेभियर बेसेराले मुद्दा दायर गरेका हुन् । आफूहरुले ट्रम्पलाई संविधानको उल्लंघन गर्नबाट रोक्न मुद्दा दायर गरेको उनले बताएका छन् ।
कोलोराडो, कनेक्टिकट, डेलावर, हवाई, इलिनोय, मैन, मेरिल्याण्ड, मिसिगन, मिनेसोटा, नेभाडा, न्युजर्सी, न्यु मेक्सिको, न्युयोर्क, ओरेगन, भर्जिनियाका महान्यायाधिवक्ताले मुद्दा दायरका लागि क्यालिफोर्नियाका महान्यायाधिवक्तालाई साथ दिएका हुन् ।
अमेरिकी राष्ट्रपति डोनाल्ड ट्रम्पले सिमानामा पर्खाल लगाउनका लागि मुलुकमा राष्ट्रिय संकटकालको घोषणा गरेका छन् । संसदले पर्खाल निर्माणका लागि बजेट विनियोजन नगरेपछि ट्रम्पले संकटकाल लगाएका हुन् ।
सन् १९७८ र सन् २०१८ को बीचमा अमेरिकामा ५८ वटा राष्ट्रिय संकटकालहरु लगाइएको छ । जसमध्ये ३१ वटा संकटकालहरु अहिले पनि सकृय नै छन् ।