पाकिस्तानको ब्रोड पीकमा हिमपहिरो : निर्मल पुर्जासहित १० आरोही बेपत्ता, उद्धारका लागि समन्वय जारी
पाकिस्तानको काराकोरम हिमशृङ्खलामा अवस्थित ८,०४७ मिटर अग्लो ब्रोड पीक हिमाल आरोहणका क्रममा गएको हिमपहिरोमा परी विश्वविख्यात नेपाली पर्वतारोही निर्मल पुर्जासहित १० जना आरोही बेपत्ता भएका छन् । बेपत्ता हुनेहरूमा ६ जना नेपालीसहित अन्य देशका नागरिक छन् ।
अन्तर्राष्ट्रिय सञ्चारमाध्यमहरूका अनुसार पुर्जाको नेतृत्वमा रहेको १० सदस्यीय टोली बिहीबार दिउँसो ब्रोड पीकमा हिमपहिरोमा परेपछि सम्पर्कविहीन भएको हो ।
पाकिस्तानी पर्वतारोहण अधिकारीहरूलाई उद्धृत गर्दै बीबीसीले जनाएअनुसार हिमपहिरोपछि उक्त टोलीसँग कुनै पनि माध्यमबाट सम्पर्क हुन सकेको छैन । टोलीमा नेपाली आरोहीहरूसहित अमेरिकी, चिनियाँ र ओमानी नागरिक सहभागी रहेको बताइएको छ ।
पर्यटन विभागका अनुसार बेपत्ता हुने नेपाली आरोहीहरूमा निर्मल पुर्जा, पूरबहादुर गुरुङ (युक्त), किली पेम्बा शेर्पा (किलु), निमा शेर्पा, नवाङ थिन्दु शेर्पा र ग्यालु शेर्पा रहेका छन् ।
यसैबीच, संस्कृति, पर्यटन तथा नागरिक उड्डयन मन्त्रालयअन्तर्गतको पर्यटन विभागले एक विज्ञप्ति जारी गर्दै घटनाप्रति गहिरो दुःख व्यक्त गरेको छ । बेपत्ता आरोहीहरूको शीघ्र खोज तथा उद्धारका लागि इस्लामाबादस्थित नेपाली दूतावासमार्फत पाकिस्तान सरकारसँग निरन्तर समन्वय भइरहेको विभागका सूचना अधिकारी हिमाल गौतमले जानकारी दिए ।
“बेपत्ता आरोहीहरूको शीघ्र खोज तथा उद्धारका लागि आवश्यक पहल र समन्वय गरिदिन सम्बन्धित सम्पूर्ण सरोकारवालाहरूलाई अनुरोध गर्दछौँ”, विभागद्वारा जारी विज्ञप्तिमा भनिएको छ ।
विश्वकै १२ औँ अग्लो हिमालका रूपमा रहेको ब्रोड पीकमा तीव्र हावाहुरी र अचानक आउने हिमपहिरोका कारण आरोहणलाई निकै जोखिमपूर्ण मानिन्छ । उद्धार टोलीहरू घटनास्थलतर्फ पठाउने तयारी भइरहे पनि प्रतिकूल मौसमका कारण खोजकार्यमा कठिनाइ भइरहेको जनाइएको छ ।