विवादास्पद यौनकाण्ड: एप्स्टिनसँग सम्बन्धित कागजात ढाकछोप गरेको ट्रम्प प्रशासनमाथि हिलारीको आरोप
प्रकाशित मिति : ४ फाल्गुन २०८२, सोमबार
राष्ट्रपति डोनाल्ड ट्रम्प नेतृत्वको प्रशासनमाथि मृतक यौन अपराधी जेफ्री एप्स्टिनसँग सम्बन्धित कागजात व्यवस्थापनमा ढाकछोप गरेको आरोप लागेको छ। अमेरिकी पूर्व विदेशमन्त्री हिलारी क्लिन्टनले ट्रम्प नेतृत्वको प्रशासनमाथि यो आरोप लगाएकी हुन्।
बर्लिनमा आयोजित वार्षिक ‘विश्व मञ्च’ कार्यक्रममा सहभागी भएकी क्लिन्टनले ती कागजात पूर्ण रूपमा सार्वजनिक गर्न माग गरिन्। उनका अनुसार सबै कागजात सार्वजनिक गर्न सम्बन्धित पक्षले जानाजानी ढिलाइ गरिरहेको छ। ह्वाइट हाउसले भने हजारौँ पृष्ठका कागजात सार्वजनिक गरेर आफूहरूले पीडितहरूको पक्षमा महत्त्वपूर्ण काम गरेको दाबी गरेको छ।
राजकुमार एन्ड्र्यु माउन्टबेटन–विन्डसरले संसदीय निगरानी समितिसामु उपस्थित भएर बयान दिनुपर्ने उनको भनाइ छ। फाइलमा नाम उल्लेख हुनु मात्रले दोष प्रमाणित नहुने भन्दै एन्ड्र्युले पनि आफूमाथिका आरोप अस्वीकार गर्दै आएका छन्।
हिलारी क्लिन्टन र उनका पति, पूर्व राष्ट्रपति बिल क्लिन्टन, दुवैलाई समितिसामु उपस्थित हुन बोलाइएको छ। बिल क्लिन्टन फेब्रुअरी २७ मा र हिलारी क्लिन्टन त्यसको अघिल्लो दिन उपस्थित हुने तय भएको छ। उनीहरूले बयान दिन सहमति जनाएपछि अवहेलनासम्बन्धी प्रस्ताव स्थगित गरिएको थियो। सन् १९८३ मा पूर्व राष्ट्रपति जेराल्ड फोर्डले बयान दिएपछि पहिलो पटक कुनै पूर्व राष्ट्रपति संसदीय समितिसामु उपस्थित हुन लागेका हुन्।
यसै महिनाको सुरुमा अमेरिकी न्याय मन्त्रालयले एप्स्टिनसँग सम्बन्धित लाखौँ कागजात सार्वजनिक गरेको थियो। संसद्ले पारित गरेको पारदर्शिता कानुनअनुसार ती सामग्री सार्वजनिक गर्नुपर्ने व्यवस्था गरिएको थियो। न्याय मन्त्रालयले आवश्यक सबै सामग्री सार्वजनिक गरिसकेको जनाए पनि केही सांसदहरूले यो पर्याप्त नभएको बताएका छन्। कानुन निर्माणमा संलग्न एक रिपब्लिकन सांसदले एप्स्टिन र उनका सहयोगीहरूविरुद्ध मुद्दा दायर गर्ने वा नगर्ने विषयमा गरिएका आन्तरिक निर्णयसम्बन्धी कागजात पनि सार्वजनिक गर्न माग गरेका छन्।
एप्स्टिन सन् २०१९ अगस्ट १० तारिखमा न्युयोर्कको कारागार कक्षमा मृत अवस्थामा फेला परेका थिए। उनी धरौटी बिना मानव बेचबिखनसम्बन्धी मुद्दाको सुनुवाइ कुरिरहेका थिए। यसअघि सन् २००८ मा नाबालिगलाई यौन सेवाका लागि प्रलोभन दिएको अभियोगमा दोषी ठहर भई उनी यौन अपराधीका रूपमा दर्ता भएका थिए। एन्ड्र्युमाथि एप्स्टिनसँगको सम्बन्धबारे बयान दिन दबाब बढिरहेको छ। एप्स्टिनकी मुख्य अभियोगकर्ताको परिवारले पनि उनलाई समितिसामु उपस्थित गराउन माग गरेको छ।
एप्स्टिनसम्बन्धी कागजातमा बिल क्लिन्टनको नाम उल्लेख भए पनि उनले दुई दशकअघि नै सम्पर्क तोडेको बताएका छन्। एप्स्टिनका पीडितहरूले क्लिन्टन दम्पतीविरुद्ध कुनै आरोप लगाएका छैनन्। क्लिन्टन दम्पतीले बन्द कोठाभित्र नभई सार्वजनिक सुनुवाइ हुनुपर्ने माग गरेका छन्। हिलारी क्लिन्टनले आफूहरू उपस्थित हुन तयार रहेको तर पारदर्शिता सुनिश्चित गर्न खुला सुनुवाइ उपयुक्त हुने बताइन्।
रिपब्लिकन समितिका अध्यक्षले क्लिन्टन दम्पतीले ढिलाइ गरेको आरोप लगाए पनि हिलारी क्लिन्टनले आफू केवल निष्पक्षता चाहेको प्रतिक्रिया दिइन्। उनका अनुसार सबैलाई समान व्यवहार गरिनुपर्छ र आफूहरूसँग लुकाउनुपर्ने केही छैन। राष्ट्रपति ट्रम्पको नाम पनि एप्स्टिनसम्बन्धी कागजातमा उल्लेख भए पनि उनले कुनै गलत काम नगरेको दाबी गर्दै आएका छन्। न्याय मन्त्रालयले ट्रम्पविरुद्धका केही दाबी आधारहीन र असत्य रहेको जनाएको छ।