ट्रम्प र बेलायती पूर्व प्रधानमन्त्री ब्लेयरबीच गाजा युद्धपछिको योजनामा छलफल
प्रकाशित मिति : भाद्र १०, २०८२ बुधबार
अमेरिकी राष्ट्रपति डोनाल्ड ट्रम्प र बेलायतका पूर्व प्रधानमन्त्री टोनी ब्लेयरबीच ह्वाइट हाउसमा भेटवार्ता भएको छ। यस बैठकको मुख्य एजेन्डा गाजा युद्धपछिको योजनाबारे छलफल गर्नु थियो।
मध्यपूर्वका लागि विशेष दूत स्टिभ विट्कोफले अमेरिकाले “युद्ध सकिएपछिको अर्को दिन”का लागि “धेरै व्यापक” योजना बनाइरहेको बताएका छन्, तर यस बैठकका बारेमा थप विवरणहरू भने सार्वजनिक गरिएको छैन।
टोनी ब्लेयरले सन् २००७ मा प्रधानमन्त्री पद छाडेपछि केही वर्षसम्म मध्यपूर्वका लागि दूतको भूमिका निर्वाह गरेका थिए। त्यस समयमा उनले प्यालेस्टिनी क्षेत्रमा आर्थिक विकास गर्ने र दुई राष्ट्र समाधानको आधार तयार पार्ने कार्यमा ध्यान केन्द्रित गरेका थिए।
यता, इजरायलका परराष्ट्र मन्त्री गिडिओन सारलाई पत्रकारहरूले प्यालेस्टिनी राज्यको सम्भावनाबारे सोध्दा उनले “यस्तो कुनै योजना छैन” भनी जवाफ दिएका छन्।
इजरायली सेनाले गाजा सिटी कब्जा गर्ने तयारी गरिरहेकाले यसलाई खाली गर्नु “अनिवार्य” भएको चेतावनी दिएको छ।
प्रत्यक्षदर्शीका अनुसार, मंगलबार राति इजरायली ट्याङ्कहरू शहरको नयाँ क्षेत्रमा प्रवेश गरी घरहरू नष्ट गरे र धेरै मानिसलाई त्यहाँबाट भाग्न बाध्य पारे।
इजरायली आक्रमणका कारण पहिले नै लाखौँ मानिस विस्थापित भइसकेका छन्। संयुक्त राष्ट्रसंघ र गैर-सरकारी संस्थाहरूले गाजा सिटीमा हुने आक्रमणले “भयानक मानवीय प्रभाव” पार्ने चेतावनी दिएका छन्।
इजरायली सेनाले आफूले “आतङ्कवादी समूह”लाई ध्वस्त पारेको र हतियारका भण्डारहरू फेला पारेको दाबी गरेको छ। प्रधानमन्त्री बेन्जामिन नेतान्याहुले सम्पूर्ण गाजा क्षेत्र कब्जा गर्ने आफ्नो योजना रहेको बताएका छन्, जसले आन्तरिक र अन्तर्राष्ट्रिय दुवै क्षेत्रमा दबाब बढाएको छ।
स्वास्थ्य मन्त्रालयका अनुसार, अक्टोबर ७, २०२३ मा हमासको आक्रमणपछि इजरायली कारबाहीमा अहिलेसम्म करिब ६२,९०० मानिसको ज्यान गइसकेको छ।