अमेरिकाको टेक्सासमा रहेका नेपालीहरूलाई प्रधानमन्त्री ओलीको आग्रह – सतर्क रहनू
प्रकाशित मिति : असार २४, २०८२ मंगलबार
प्रधानमन्त्री केपी शर्मा ओली । तस्बिर : रासस
नेपालका प्रधानमन्त्री केपी शर्मा ओलीले अमेरिकाको टेक्सासमा रहेका नेपालीहरूलाई सतर्क रहन आग्रह गरेका छन् । मङ्गलवार सामाजिक सञ्जालमार्फत प्रधानमन्त्री ओलीले टेक्सासमा बाढी आएकाले बसोबास गर्ने नेपालीलाई सतर्क रहन आग्रह गरेका हुन् ।
प्रधानमन्त्री ओलीले टेक्सासमा आएको बाढीका कारण १०० जनाभन्दा बढीको ज्यान गएको र ती ज्यान गुमाउनेप्रति श्रद्धाञ्जली अर्पण गरेका छन् ।
“अमेरिकास्थित टेक्सासमा धेरै नेपालीको बसोबास छ । त्यहाँ अहिले बाढीका कारण १०० जना भन्दा बढीको ज्यान गएको खबर आएको छ । टेक्सासको बाढीबाट ज्यान गुमाउने सबैलाई श्रद्धाञ्जली अर्पण गर्दछु । त्यहाँ बसोबास गर्ने नेपालीहरूलाई सतर्क रहन आग्रह गर्दछु”, प्रधानमन्त्री ओलीले लेखेका छन् ।
टेक्सासमा विनाशकारी बाढीबाट ज्यान गुमाउनेहरूको सङ्ख्या एक सयभन्दा बढी पुगेको छ । उद्धारकर्ताहरूले बेपत्ता मानिसहरूको खोजी जारी राखेका छन् ।
मौसम पूर्वानुमानकर्ताहरूले जलमग्न जमिनमा वर्षा हुँदा थप बाढीको चेतावनी दिएका छन् । वर्षाले हेलिकप्टर, डुङ्गा, कुकुर र करिब एक हजार सात सय ५० जना कर्मचारी समावेश भएको उद्धार प्रयासलाई जटिल बनाएको छ ।