अमेरिकी पूर्व एफबीआई निर्देशक कोमीलाई गुप्त सेवाका अधिकारीले किन गरे सोधपुछ ?
प्रकाशित मिति : जेष्ठ २, २०८२ शुक्रबार
अमेरिकी पूर्व एफबीआई निर्देशक जेम्स कोमीलाई अमेरिकी गुप्त सेवाका अधिकारीहरुले नियन्त्रणमा लिएर सोधपुछ गरेका छन ।
शुक्रबार दिउँसो वासिङ्गटन फील्ड अफिसमा अमेरिकी गुप्त सेवाका एजेन्टहरूले सोधपुछका लागि कोमीलाई नियन्त्रणमा लिएको बताइएको छ ।
कोमीले बिहीबार इन्स्टाग्राममा बालुवामा राखिएका शंखहरूद्वारा ‘८६ ४७’ लेखिएको फोटो पोस्ट गरेका थिए । जसलाई राष्ट्रपति डोनाल्ड ट्रम्पका समर्थकहरूले राष्ट्रपति हटाउने संकेतको रूपमा व्याख्या गरेका छन्।
‘८६’शब्द अमेरिकी स्ल्याङमा ‘हटाउन’ वा ‘नष्ट गर्न’ को अर्थमा प्रयोग हुन्छ, र ‘४७’ भनेको ट्रम्पको वर्तमान कार्यकालको संख्या हो।
कोमीले उक्त पोस्टलाई ‘कूल शेल फर्मेशन’ भनेर व्याख्या गरेका थिए । कुनै हिंसात्मक सन्देश दिन चाहेको थिएनन् भनेर स्पष्ट पारेका छन्।
पोस्ट हटाएपछि, गुप्त सेवाले उनलाई सोधपुछका लागि बोलाएको हो। कोमी अहिले हिरासतमा छैनन् र स्वेच्छाले उपस्थित भएका छन्।
राष्ट्रपति ट्रम्प र रिपब्लिकन नेताहरूले कोमीको पोस्टलाई राष्ट्रपति हत्या गर्ने आह्वानको रूपमा व्याख्या गर्दै अनुसन्धानको माग गरेका छन्।
कोमीले भनेका छन् कि उनले उक्त संख्या र त्यसको सम्भावित हिंसात्मक अर्थबारे थाहा थिएन । त्यसैले पोस्ट हटाएका छन्। गुप्त सेवाका प्रवक्ताले भनेका छन् कि उनीहरूले यस प्रकारका सम्भावित धम्कीहरूको गम्भीरतासाथ अनुसन्धान गर्छन्।
विशेष गरी हालैको सुप्रीम कोर्टको निर्णय र अभिव्यक्ति स्वतन्त्रताको पक्षमा रहेका न्यायालयका निर्णयहरूको कारणले कानूनी दृष्टिकोणबाट कोमीमाथि अभियोग लगाउनु चुनौतीपूर्ण हुनसक्छ ।
विशेषज्ञहरूको अनुसार, यस प्रकारको पोस्टलाई कानूनी रूपमा धम्कीको रूपमा लिने आधार कमजोर छ।
यो घटनाले राजनीतिक दृष्टिकोणबाट पनि चासोको विषय बनेको छ । विशेष गरी ट्रम्प र कोमीबीचको विगतका विवादहरूको कारणले यो अवस्था उत्पन्न भएको हो ।
कोमीलाई २०१७ मा ट्रम्पले रूससँगको सम्बन्धको अनुसन्धानको क्रममा बर्खास्त गरेका थिए । त्यसपछि उनी ट्रम्पका आलोचक बनेका छन्।
गुप्त सेवा र एफबीआई कोमीको पोस्टको सन्देश र त्यसको कानूनी अर्थबारे थप अनुसन्धान तयारीमा जुटेका छन ।