राष्ट्रपतिको लागि गाडी किन्न बजेट माग भएको छैन : प्रधानमन्त्री
प्रकाशित मिति : असार २६, २०७४ सोमबार
असार २६, २०७४- प्रधानमन्त्री शेरबहादुर देउवाले राष्ट्रपतिका लागि सवारी साधन खरिदका लागि बजेट माग नभएको सोमबार बताएका छन् । संसदमा नेपाल मजदुर किसान पार्टीका साँसद प्रेम सुवालले गरेको प्रश्नको जवाफ दिने क्रममा प्रधानमन्त्री देउवाले राष्ट्रपति सुरक्षा र गरिमाका लागि पनि महंगो गाडी आवश्यक पर्ने बताए ।
‘राष्ट्रपतिलाई महंगो गाडी खरिदका लागि प्रस्ताव आएको छैन,’ प्रधानमन्त्री देउवाले भने– ‘राष्ट्रपति पदको गरिमा र सुरक्षाका लागि त्यस्तै किसिमको गाडीको आवश्यकता पर्छ ।’
आइतवार राष्ट्रपतिका लागि सवारी साधन खरिद गर्नका लागि १६ करोड रुपैयाँ सरकारसंग माग गरेको समाचार सार्वजनिक भएपछि त्यति ठुलो रकम किन चाहिने भन्दै सामाजिक सञ्जालहरुमा प्रश्न उठेको छ । सुवालले राष्ट्रपतिका लागि १६ करोडको सवारी साधन किन्ने लागिएको विषयमा चलेका चर्चाबारे प्रधानमन्त्रीसंग प्रश्न गरेका थिए ।