गोठ छुने प्रेम बहादुर विकलाई दुई हजार जरिवाना
प्रकाशित मिति : असार ११, २०७४ आईतबार
बाजुरा जिल्लाको छेडेदह गाउँपालिका–१ बिराडी गाउँमा भैंसी गोठ छोएको निहुँमा प्रेम बहादुर विकलाई दुई हजार रकम जरिवाना तिराइएको छ ।
शुक्रबार दिउँसो नेकपा (एमाले)को प्रचारमा हिँडिरहेका बेला राजेन्द्रबहादुर सिंहको भैंसी गोठ अर्थात छाना छोएकामा विकले गाली खानुप¥यो । अब देउता मान्नुपर्ने भन्दै विकलाई रु दुई हजार जरिवानासमेत तिराइएको स्थानीय वीरबहादुर रावलले बताउनुभयो ।
विक नेकपा (एमाले)का वडा अध्यक्षका उम्मेदवार वीरबहादुर रावलसँग प्रचारमा हिँडेका थिए । छानाको बाटो भएर करिव २० मिटर टाढा हिड्दा ‘मेरो छाना किन छोइस् ? अब देउता रिसाउछन् पुज्नु प¥यो’ भनेर गाली गरेका पीडित विकले बताउनुभयो ।
वडा अध्यक्षका उम्मेदवार रावलले भन्नुभयो, “विकसँग पैसा थिएन, त्यही भएर मैले आफैं पैसा तिरिदिएको हुँ । पैसा नतिरे उनलाई नछोड्ने भए ।”
विकले आफूमाथि भएको जातीय विभेदको घटनाबारे जिल्ला दलित विकास मञ्चमा जानकारी दिएको शङ्कर चदाराले बताउनुभयो । ‘मञ्चले प्रेस विज्ञप्तिमार्फत खेद व्यक्त गर्दै कारबाहीका लागि जिल्ला प्रशासन कार्यालय बाजुरामा उजुरी दिएको छ ।
प्रमुख जिल्ला अधिकारी देवेन्द्र लामिछानेले घटनाबारे अनुसन्धान भइरहेको बताउनुभयो । रासस