भण्डार र वितरणमा सहज जोन्सन एण्ड जोन्सनको भ्याक्सिन तेश्रो चरणको क्लीनिकल परीक्षणमा
प्रकाशित मिति : आश्विन ७, २०७७ बुधबार
अन्तिम चरणको परीक्षणमा रहेका अन्य तीन भ्याक्सिनको तुलनामा भण्डारण गर्न र परिचालन गर्न सहज जोन्सन एण्ड जोन्सनको कोरोनाबिरुद्धको भ्याक्सिनको अन्तिम चरणको परीक्षण सुरु भएको छ । तेश्रो चरणको क्लीनिकल परीक्षण अन्तरगत यो भ्याक्सिन ६० हजारलाई सिंगल सट दिइने भएको छ ।
यसअगाडि नै अमेरिकाका मोडेर्ना, फाइजर र बेलायतको आष्ट्राजेनेकाले बनाएको कोरोनाबिरुद्धको भ्याक्सिन तेश्रो चरणको क्लीनिक परीक्षणका क्रममा छन् । तर यी भ्याक्सिन अत्यन्तै चिसो तापक्रममा राख्नुपर्ने भएकाले भण्डारण र परिचालन गर्नमा कठिन हुने जनाइएको छ ।
जोन्सन एण्ड जोन्सनको अमेरिकामा तेश्रो चरणको क्लीनिकल परीक्षण पूरा भइसकेपछि यसको प्रभावकारिताबारे निक्र्यौल निकालिने भएको छ । तर जोन्सन एण्ड जोन्सनको सबै डाटाहरु तयार हुन यो बर्षको अन्त्यसम्म लाग्ने अनुमान गरिएको छ । अर्कोबर्ष यो कम्पनीले १ बिलियन डोज तयार पार्ने लक्ष्य लिएको छ ।
यो भ्याक्सिनको एउटामात्रै डोज दिए पुग्ने भएकाले पनि स्वीकृत भएको खण्डमा भ्याक्सिन लगाउने कार्य सहज हुनेछ । तेश्रो चरणको क्लीनिकल परीक्षणमा रहेका अन्य भ्याक्सिनहरु दुईवटा डोज दिनुपर्ने जनाइएको छ । अमेरिकाले यो भ्याक्सिनका लागि डेढ बिलियन डलर लगानी गरेको छ, जसअन्तरगत सुरुमै १ सय मिलियन डोज अमेरिकाले पाउनेछ ।
जोन्सन एण्ड जोन्सनको भ्याक्सिन भाइरल भेक्टर विधिबाट बनाइएको छ । जस अन्तरगत हानी नगर्ने भाइरसको प्रयोग गरिन्छ । मोडेर्ना र फाइजरका भ्याक्सिन न्युक्लेइक एसिडको प्रयोगबाट बनाइएका हुन् । आष्ट्राजेनका भ्याक्सिन भने भाइरल भेक्टर विधिबाट बनाइएको हो ।