मास्क घाँटीमा बेरेर आफ्नै ज्यान लिए अमेरिकी जेलमा रहेका कैदीले
प्रकाशित मिति : श्रावण ३२, २०७७ आईतबार
मास्क घाँटीमा बेरेर अमेरिकाको कनेक्टिकटको जेलमा रहेका एकजना कैदीले आफ्नो ज्यान आफै लिएका छन् । ३२ बर्षीय डानियल ओकासियोले मास्क घाँटीमा बेरेर आफ्नो ज्यान आफै लिएको प्रहरीले जनाएको छ ।
उनलाई कोरोनाको संक्रमण फैलिनबाट रोक्ने उद्देश्यले कपडाको मास्क दिइएको थियो । तर उनले त्यही मास्क घाँटीमा बेरेका थिए । उनलाई अस्पतालमा लगिएपनि अस्पतालले मृत घोषणा गरेको थियो ।
उनको मृत्युबारे थप अनुसन्धान भइरहेको जनाइएको छ । उनी गत अगस्त ५ देखि थर्ड डिग्री डकैतीको अभियोगमा जेलमा रहेका थिए । कोरोनाको महामारीका बेलामा जेलमा रहेका कैदीहरु जोखिममा रहेकोबारे बहस भइरहँदा उनको मृत्यु भएको हो ।
गत जुलाईमा प्रकाशित एउटा तथ्यांक अनुशार जेलभित्र संक्रमणदर झण्डै ६ गुणा बढी रहेको देखाइएको थियो । हरेक एकलाखमा औषतमा ३२५१ कैदीहरु संक्रमित रहेको तथ्यांकमा देखाइएको थियो ।
कनेक्टिकटको जेलमा १३ सय भन्दा धेरै कैदीहरुमा कोरोना संक्रमण पुष्टी भइसकेको छ । कम्तीमा ७ जनाको संक्रमणबाट मृत्यु भइसकेको छ ।