अपराधबिरुद्धको युनिट खारेजपछि न्युयोर्कमा हिंशामा बृद्धि, ४८ घण्टामा ४० जनामाथि गोली प्रहार
प्रकाशित मिति : श्रावण ३१, २०७७ शनिबार
विगत ४८ घण्टामा न्युयोर्क सिटीमा ४० जनामाथि गोली प्रहार भएको छ । शुक्रबार र शनिबार भएका विभिन्न गोलीकाण्डमा कम्तीमा २ जनाको मृत्यु भएको छ ।
जुन महिनादेखि हिंशाका घटना बढ्दै गएपनि विगत ४ सातादेखि न्युयोर्क सिटीमा हिंशाका घटनाहरुमा थप बृद्धि भएको छ । गतबर्षको सोही अवधिको तुलनामा यो बर्ष यस्ता घटनामा तेब्बर बृद्धि भएको छ ।
खासगरी न्युयोर्कमा अपराधबिरुद्धको रणनीतिमा परिवर्तन गरेयता हिंशाका घटनामा बृद्धि भएको हो । प्रहरीबिरुद्ध प्रदर्शनहरु भएपछि जुन महिनामा न्युयोर्कको अपराधबिरुद्धको युनिट खारेज गरेर त्यहाँ रहेका झण्डै ६ सय प्रहरी अफिसरहरुलाई अन्यकाममा लगाइएको थियो ।
शनिबार विहान भएका घटनामा दुईजनाको मृत्यु भएको थियो । अरु ४० घाइतेहरु शुक्रबार मध्यरातदेखि बेलुका पौने ५ बजेसम्मका हिंशात्मक घटनामा परेकाहरु थिए ।
सबैभन्दा भयानक गोलीकाण्ड विहान १ बज्नैलाग्दा हार्लममा भएको थियो, जहाँ छातीमा लागेको गोलीका कारण एकजना ३० बर्षका व्यक्तिको मृत्यु भएको थियो । दोश्रो घटना क्वीन्सको रिजउड स्ट्रीटमा विहान ३ बजे भएको थियो, जहाँ ड्युटीमा नभएका एकजना करेक्सन अफिसरमाथि टाउकोमा गोली हानेर हत्या गरिएको थियो ।