अमेरिकनलाई तलबी विदा दिने र निशुल्क कोरोना परिक्षण गर्ने बिल सदनमा
प्रकाशित मिति : फाल्गुन ३०, २०७६ शुक्रबार
कोरोना भाइरसको संक्रमणबारेको एउटा राहत प्याकेजबारे आज अमेरिकी संसदमा मतदान हुने भएको छ । केही अमेरिकनलाई तलबी विदा दिने र निशुल्क कोरोना परीक्षण गर्ने बिलमा आज अमेरिकी संसदको तल्लो सदनमा मतदान हुँदैछ ।
एचआर ६२०१ नामको यो बिलमा अमेरिकी राष्ट्रपति डोनाल्ड ट्रम्पले समर्थन जनाएका छन् । यो बिलले कोरोनाभाइरस परीक्षणमा आफ्नो निर्देशिकालाई अनुशरण गर्ने र प्रभावित अमेरिकन कामदारलाई तलबी विदाको सुविधा दिने ट्रम्पले बताएका छन् ।
साना ब्यापारमा आघात पर्न नदिन आफूले सरकारका निकायहरुलाई निर्देशन दिइसकेको ट्रम्पले बताएका छन् । अमेरिकी संसदको तल्लो सदनकी स्पीकर न्यान्सी पेलोसीले यो बिल छिट्टै पारित हुने बताएकी छिन् ।
अमेरिकामा राष्ट्रपति डोनाल्ड ट्रम्पले संकटकालको घोषणा गरेपछि अस्पतालहरुलाई आपतकालिन तयारीका योजनाहरु सकृय बनाउन निर्देशन दिइएको छ । आगामी साताको सुरुसम्म अमेरिकामा ५ लाखको परीक्षण गर्नसक्ने क्षमता हुने कार्यान्वयन हुनेछ ।
साथै अमेरिकाले एकमहिनामा ५० लाखको परीक्षण गर्नसक्ने क्षमता तयार पार्ने भएको छ । तर विना कुनै लक्षण परीक्षणका लागि नजान अधिकारीहरुले सुझाव दिएका छन् । साथै स्पष्ट आवश्यकता नभएसम्म परीक्षण आवश्यक नभएको समेत बताइएको छ ।
यसैबीच अमेरिकी राष्ट्रपति डोनाल्ड ट्रम्पले युरोपका अन्य देशबाट समेत अमेरिका आउनमा प्रतिबन्धका लागि पुनरावलोकन गरिरहेको बताएका छन् । उनले एकदुई दिनमा केही देशहरु थपिने र केही हटाउनसमेत सकिने बताएका छन् ।
अमेरिकामा संकटकालको घोषणा गरिएपछि झण्डै ५० बिलियनको आपतकालिन राहत कोष परिचालन गर्न सकिने भएको छ । राष्ट्रपति ट्रम्पले आगामी दुईमहिना संकटग्रस्त हुने बताएका छन् ।
अमेरिकाले आजैदेखि लागु हुनेगरी युरोपका शेंगेन क्षेत्रका मुलुकहरुबाट अमेरिका आउनमा प्रतिबन्ध लगाएको छ ।
२६ युरोपियन देशबाट अमेरिका आउनमा प्रतिबन्ध : कसकसलाई दिइयो छुट ?
अमेरिकी सरकारले युरोपको २६ देशबाट अमेरिका आउनमा प्रतिबन्ध लगाएको छ । साथै ती देशको गरेका विश्वका सबै देशका नागरिकहरुलाई अमेरिका आउनमा प्रतिबन्ध लगाएको छ । अमेरिका आउनुभन्दा १४ दिनको बीचमा युरोपका शेंगेन क्षेत्रको भ्रमण गरेका सबै विदेशी नागरिकहरुलाई अमेरिका आउनमा प्रतिबन्ध लगाइएको हो ।
तर केही व्यक्तिलाई भने यो प्रतिबन्धबाट छुट दिइएको छ । अर्थात् उनीहरुलाई विगत १४ दिनभित्र ती देशको भ्रमण गरेको भएपनि अमेरिका आउन दिइनेछ । अमेरिकी नागरिकलाई यस्तो प्रतिबन्ध लाग्नेछैन । अमेरिकी नागरिकबाहेक यस्तो छुट पाउनेहरुमा पहिलो नम्बरमा अमेरिकाका ग्रिनकार्डवाहकहरु रहेका छन् ।
त्यस्तै अमेरिकी नागरिक वा ग्रिनकार्डवाहकका दम्पत्तिलाई पनि यस्तो प्रतिबन्ध लाग्नेछैन । २१ बर्ष मुनीका अविवाहित ग्रिनकार्डवाहक र नागरिकका अभिभावक वा बाबुआमामाथि पनि यस्तो प्रतिबन्ध लाग्नेछैन ।
त्यस्तै २१ बर्ष मुनीका अविवाहित ग्रिनकार्डवाहक र नागरिकका दाजुभाईदिदीबहिनीमाथि पनि यो प्रतिबन्ध लाग्नेछैन । अमेरिकी नागरिक वा ग्रिनकार्डवाहकका बच्चा, पालनपोषण गरेका बच्चा, धर्मसन्तानका रुपमा अमेरिका आउन लागेकाहरुमाथि पनि यस्तो प्रतिबन्ध लाग्नेछैन ।
त्यस्तै कोरोना भाइरसको संक्रमण कम गर्न अमेरिकी सरकारको निमन्त्रणामा आउन लागेकाहरुमाथि पनि यो प्रतिबन्ध लाग्नेछैन । विमान वा पानीजहाजका क्रु मेम्बरका रुपमा अमेरिका आउनेहरुलाई पनि यो प्रतिबन्ध नलाग्ने भएको छ ।
विदेशका सरकारी अधिकारीहरु र उनीहरुका परिवारका सदस्यहरुमाथि पनि यो प्रतिबन्ध लाग्नेछैन । त्यस्तै नाटो क्याटेगोरीमा भिसा पाउनेहरुलाई र संयुक्त राष्ट्रसंघको मुख्यालय सममति अनुरुप भिसा पाउनेहरुलाई पनि यो प्रतिबन्ध लाग्नेछैन ।
अमेरिकी स्वास्थ्यमन्त्रीले कुनै व्यक्तिले अमेरिकामा भाइरस नफैलाउने कुरा सीडीसी निर्देशकमार्फत ठहर गरेमा त्यस्तो व्यक्तिमाथि पनि प्रतिबन्ध लगाइनेछैन । अमेरिकी सरकारले कानुन कार्यान्वयनका लागि महत्वपूर्ण ठानेका व्यक्तिलाई पनि प्रवेशमा रोक लगाइनेछैन ।
अमेरिकाको राष्ट्रिय हितमा ठहर गरिएकाहरुलाई पनि प्रतिबन्ध लगाइनेछैन । साथै अमेरिकी सेना र उनीहरुका दम्पत्ति तथा छोराछोरीहरुलाई पनि प्रतिबन्ध लाग्नेछैन ।
अमेरिकी सरकारको यो घोषणाले एसाइलमका योग्यतामा कुनै असर नपर्ने जनाइएको छ । साथै अमेरिकाबाट देशनिकाला हुनबाट बच्ने राहतका लागि पनि यो घोषणाले कुनै असर गर्नेछैन ।
अष्ट्रिया, बेल्जियम, चेक रिपब्लिक, डेनमार्क, इस्टोनिया, फिनल्याण्ड, फ्रान्स, जर्मनी, ग्रिस, हंगेरी, आइसल्याण्ड, इटली, लाटभिया, लिचेतेनिस्तान, लिथुआनिया, लक्जेम्बर्ग, माल्टा, नेदरल्याण्डस, नर्वे, पोल्याण्ड, पोर्चुगल, स्लोभाकिया, स्लोभेनिया, स्पेन, स्वीडेन र स्वीट्जरल्याण्डको भ्रमण गरेका विदेशी नागरिकलाई पनि अमेरिकामा प्रतिबन्ध लगाइएको हो ।
गत जनवरी र फरबरीमा अमेरिकाले चीन र इरानका सन्दर्भमा पनि यस्तै प्रतिबन्धको घोषणा गरेको थियो, जुन अहिलेसम्म कायम रहेको छ ।
आगामी ४८ घण्टाभित्र अमेरिका सरकारले यसबारेमा थप निर्देशिकाहरु जारी गर्ने भएको छ । शेंगेन क्षेत्रमा गएका अमेरिकी यात्रुहरुलाई छनौट गरिएका विमानस्थलबाट यात्रा गर्नसक्नेबारे पुरक सुचना जारी गरिने भएको छ ।
यो प्रतिबन्ध अमेरिकी राष्ट्रपति ट्रम्पले अर्को आदेश जारी नगर्दासम्मका लागि लागु हुने भएको छ । पहिले नै अमेरिका आउनका लागि बाटोमा रहेकाहरुका सन्दर्भमा भने यो प्रतिबन्ध लागु नहुने जनाइएको छ । शुक्रबार राती ११ बजेर ५९ मिनेटजाँदादेखि यो प्रतिबन्ध लागु हुने भएको छ ।
यो प्रतिबन्ध शेंगेन क्षेत्रमा रहेका २६ युरोपियन देशहरुका सन्दर्भमा लागु हुने भएको छ । यसअगाडि ट्रम्पले गरेको सम्बोधनमा बेलायत बाहेक युरोपका सबैदेशहरु भनिएपनि लगत्तै सार्वजनिक गरिएको सुचनामा शेंगेन क्षेत्रमा पर्ने देशहरुमात्र रहेको स्पष्ट पारिएको छ ।