न्युयोर्क : लङ आइल्याण्डमा स्कुल बसका २ चालकमा कोरोना, वेष्टचेस्टरमा सेना परिचालन
प्रकाशित मिति : फाल्गुन २७, २०७६ मंगलबार
न्युयोर्कको लङ आइल्याण्डमा स्कुल बसका दुईजना चालकमा कोरोना भाइरसको संक्रमण पुष्टी भएको छ । उनीहरुले झण्डै ८० जना विद्यार्थीहरुलाई बसमा चढाउँदै आएका थिए ।
ती बसमा चढेका विद्यार्थीका अधिकांश परिवारलाई स्वास्थ्य विभागले क्वारेन्टाइनमा राखेको छ । स्कुल बसका ड्राइभरमा कोरोना संक्रमण पाइएपछि त्यस क्षेत्रका विद्यालयहरु बन्द गरिएको छ ।
लङ आइल्याण्डमा अहिलेसम्म १९ जनामा कोरोना संक्रमण पुष्टी भएको छ । त्यहाँका ७२ जनालाई अनिवार्य क्वारेन्टाइनमा राखिएको छ भने ७४ जनालाई सावधानीयुक्त क्वारेन्टाइनमा राखिएको छ । १० जनाको ल्याब रिपोर्ट आउन बाँकी रहेको छ ।
न्युयोर्क राज्यमा अहिलेसम्म १७३ जनामा कोरोना संक्रमण पुष्टी भइसकेको छ । हिजोबाट थप ३१ जनामा संक्रमण पुष्टी भएको हो । न्युयोर्क सिटीमामात्र कोरोना संक्रमितको संख्या ३६ पुगेको छ ।
न्युयोर्क राज्यको कोरोनाको इपिसेन्टर वेस्टचेस्टर काउन्टी रहेको छ । त्यहाँ १०८ जनामा कोरोना संक्रमण पुष्टी भएको छ । वेष्टचेस्टरको न्यु रोशेललाई संक्रमित क्षेत्रमा रुपमा घोषणा गरिएको छ ।
त्यस क्षेत्रका विद्यालयहरु २ साताका लागि बन्द गरिएको छ भने त्यस क्षेत्रमा समुदायको सहयोगका लागि सेना परिचालन गरिने भएको छ । न्यु रोशेलको एकमाइल आसपासको क्षेत्रलाई जोखिमपूर्ण मानिएको छ ।