अमेरिकाका ३७ राज्यमा कोरोना, ९ राज्यमा संकटकाल
प्रकाशित मिति : फाल्गुन २६, २०७६ सोमबार
आज न्युजर्सीका गभर्नर फिल मर्फीले संकटकालको घोषणा गरेपछि कोरोना संक्रमणका कारण संकटकाल घोषणा गर्ने राज्यको संख्या अमेरिकामा ९ पुगेको छ । यसअगाडि विभिन्न ८ वटा राज्यले संकटकालको घोषणा गरिसकेका छन् ।
ओरेगन, क्यालिफोर्निया, न्युयोर्क, वासिंटन, केन्टकी, मेरिल्याण्ड, ओहायो र फ्लोरिडाले संकटकाल घोषणा गरिसकेका छन् । अहिलेसम्म अमेरिकाका अधिकांश राज्यमा कोरोना संक्रमण पुष्टी भइसकेको छ ।
अमेरिकामा मृतकको संख्या २७ पुगिसकेको छ भने संक्रमितको संख्या ७ सय ८ पुगेको छ । अहिलेसम्म अमेरिकाका ३७ राज्यमा कोरोना संक्रमण पुष्टी भएको छ ।
सबैभन्दा धेरै वासिंटन राज्यमा १७९, त्यसपछि न्युयोर्कमा १४२ र क्यालिफोर्नियामा १३९ मा संक्रमण पुष्टी भएको छ । मासाचुसेट्समा २८ र टेक्सासमा २४ जनामा संक्रमण भएको छ ।
अमेरिकामा संक्रमितहरुमध्ये ३१४ जनालाई कसरी संक्रमण भयो भन्ने केही खुलेको छैन । न्युयोर्कको न्यु रशेलमा वकिलमा भएको संक्रमण अरु ५३ जनामा फैलिएको छ । किर्कल्याण्ड वासिंटनमा ५३ जना नर्सिंग होममा संक्रमण भएका छन् ।
डायमण्ड प्रिन्सेस क्रुजसिपमा ४३ जना, अमेरिकामा व्यक्तिगत सम्पर्कबाट ४२ जना, विदेशमा यात्रा गरेकाहरु ३३ जना, इटली यात्रा गरेकाहरु २८, इजिप्ट यात्रा गरेकाहरु २८ जना, बोस्टनको बिजनेश कन्फ्रेन्समा गएकाहरु २७ जना, मार्चको ग्राण्ड प्रिन्सेस क्रुजसिपमा २१ ज्ना, फरबरीमा ग्राण्ड प्रिन्सेस क्रुजसिपमा १८ जना, चीनको यात्रा गरेकाहरु १५ जना, अमेरिकाभित्रै यात्रा गरेकाहरु १५ जना, क्यालिफोर्नियाको भ्याकाभिल अस्पतालमा ३ जना , साउथ कोरियाको यात्रा गरेका १ जना र इरान यात्रा गरेका एकजना रहेका छन् ।