युएईमा सरकारले जासुसी गर्न च्याट एप प्रयोग गरेको खुलासा
प्रकाशित मिति : पुस ८, २०७६ मंगलबार
युएईमा एउटा च्याट एप्लिेकेशन निकै प्रचलनमा रहेको छ, टुटक । दुबई, अबुधाबी लगायतका क्षेत्रमा काम गर्ने कैयन नेपालीहरुले समेत यो एप्लिकेशनको प्रयोग गर्दै आएका छन् । युएईमा लोकप्रिय बनेको यो एप्लिकेशन त्यहाँको सरकारले जासुसीमा प्रयोग गरेको खुलासा भएको छ ।
परिवार र साथीहरुबीच कुराकानीका लागि प्रयोग गरिने यो एप्लिकेशन सरकारले प्रयोगकर्ताको ट्रयाक गर्नमा प्रयोग गरेको हो । सरकारले सम्बाद, तस्वीर र अरु तथ्यांकहरु ट्रयाक गर्नका लागि यो एपको प्रयोग गरेको रिपोर्ट न्युयोर्क टाइम्सले प्रकाशित गरेको छ ।
युएईमा एप्पलको फेसटाइममा प्रतिबन्ध लगाइदै आएको छ । त्यस्तै ह्वाट्सएप लगायतका फेसबुकका एपमार्फतपनि भिडियो वा अडियो कल गर्नमा प्रतिबन्ध लगाइएको छ । यो अवस्थामा आएको टुटक केही महिनामा नै लाखौंले डाउनलोड गरेका थिए ।
यो एप्लिकेशनले सरकारलाई धेरै तरिकाबाट प्रयोगकर्ताका बारेमा पहुच दिएको छ । तर लाखौं प्रयोगकर्ताले यो कुरा नबुझेर यो एप डाउनलोड गरेर सरकारलाई आफ्ना सबै सुचनाका बारेमा पहुच दिइरहेका छन् ।