पत्रकार जमाल खशोग्गीको हत्या अभियोगमा ५ जनालाई मृत्युदण्डको फैसला
प्रकाशित मिति : पुस ७, २०७६ सोमबार
साउदी अरेबियाले पत्रकार जमाल खशोग्गीको हत्या अभियोगमा ५ जनालाई मृत्युदण्ड दिने फैसला गरेको छ । पत्रकार खशोग्गीको टर्कीमा रहेको साउदी कन्सुलेटभित्र हत्या भएको थियो ।
एकजना पूर्व उच्च शाही सल्लाहकारबिरुद्धसमेत अनुसन्धान भएपनि उनलाई भने अभियोग नलगाई रिहा गरिएको छ । वासिंटन पोष्टका स्तम्भकार खशोग्गीको हत्यामा साउदी राजकुमार मोहम्मद बिन सलमानको समेत संलग्नता रहेको सीआईएले निष्कर्ष निकालेको थियो ।
अभियोजनकर्ताहरुले अरु तीनजनालाई समेत कुल २४ बर्ष जेल सजाय तोकिएको जनाएका छन् । पत्रकार खशोग्गीको हत्या निकै विभत्स तरिकाले भएको खुलासा भएको थियो । उनको शव काटेर टुक्रा–टुक्रा पारी एसिडमा हालिएको हुनसक्ने बताइएको थियो ।
खशोग्गीको हत्या टर्कीमा रहेको साउदी कन्सुलेटमा भएको थियो । साउदी राजकुमार मोहम्मद बिन सलमानले अमेरिकासँग जमाल खशोग्गी एक ‘खतरनाक इस्लामिस्ट’ भएको बताएका थिए । उनले ह्वाइट हाउसमै फोन गरेर यस्तो जानकारी दिएका थिए ।
वाशिंगटन पोस्ट र न्यूयोर्क टाइम्सका अनुसार साउदी खशोग्गी बेपत्ता भएको र साउदीले उनको हत्या भएको स्वीकार गर्नुभन्दा पहिले साउदी राजकुमारले फोन गरेका थिए । तर साउदी अरबले भने यो कुराको खण्डन गर्दै आएको छ ।
खशोग्गी टर्कीमा बस्दै आएकी आफ्नी प्रेमिकासँगको विवाहको कागजपत्र मिलाउन वाणिज्य दूतावास गएका थिए । साउदी अरबले पहिले खशोग्गी दूतावासमा आएको तर सुरक्षित रुपमा बाहिर गएको बताएको थियो । तर सबैतिरबाट दबाब आएपछि उसले दूतावासभित्रै खशोग्गीको हत्या भएको स्वीकार गरेको थियो ।