ट्रम्पबाट १.४ ट्रिलियन डलरको विधेयकमा हस्ताक्षर, सुर्तीजन्य पदार्थमा उमेर हदबन्दी २१ बर्ष
प्रकाशित मिति : पुस ५, २०७६ शनिबार
अमेरिकी राष्ट्रपति डोनाल्ड ट्रम्पले १ दशमलव ४ ट्रिलियन डलरको खर्च विधेयकमा हस्ताक्षर गरेका छन् । अब सेप्टेम्बरसम्मका लागि सरकार शटडाउनको सम्भावना टरेको छ ।
बजेटमा बन्दुक हिंशाको शोधका लागि रकम छुट्याइएको छ भने सुर्तीजन्यबस्तु किन्नका लागि न्यूनतम उमेर २१ बर्ष बनाइएको छ । दुईदलीय खर्च विधेयकले आगामी सेप्टेम्बरसम्मका लागि बजेट पारित गरेको छ भने शुक्रबारदेखि हुनेसम्भावना रहेको सरकार शटडाउन पनि टारेको छ ।
अमेरिकी राष्ट्रपति ट्रम्पबिरुद्धको महाअभियोग संसदको तल्लो सदनबाट पारित भएको भोलिपल्टै खर्च विधेयक पारित गरिएको हो । यसपटक पनि ट्रम्पले सिमानामा तारबारका लागि १ दशमलव ४ बिलियन डलर छुट्याउन सफल भएका छन् । गतबर्षपनि संसदबाट यही बजेट पारित भएको थियो ।
राष्ट्रपति ट्रम्पले पर्खाल निर्माणका लागि ८ दशमलव ६ बिलियन डलर माग गरेपनि माग गरेको तुलनामा कममात्र रकम पारित भएको थियो । खर्च विधेयकमा हस्ताक्षर गरेपछि ट्रम्प क्रिसमस मनाउन एयरफोर्स वानमा फ्लोरिडातिर लागेका छन् ।
अबदेखि अमेरिकामा सुर्तीजन्य पदार्थ किनबेचका लागि २१ बर्ष उमेर पुग्नुपर्ने संघीय कानुन बनाइएको छ । यसअगाडि सुर्तीजन्य पदार्थ किनबेचका लागि १८ बर्ष उमेर पुग्नुपर्ने संघीय कानुन थियो । कम्तीमा १८ बर्ष हुनुपर्ने भएपनि कतिपय राज्यले त्यो भन्दामाथि उमेरको हद समेत तोकेका थिए । तर अब कम्तीमा २१ बर्ष हुनुपर्ने भएको छ ।