हाउसबाट महाअभियोग पारित गरेको ४८ घण्टा नबित्दै ट्रम्पलाई पेलोसीको निम्ता
प्रकाशित मिति : पुस ४, २०७६ शुक्रबार
अमेरिकी संसदको तल्लो सदन प्रतिनिधिसभाबाट राष्ट्रपति डोनाल्ड ट्रम्पबिरुद्धको महाअभियोग पारित गरेको ४८ घण्टा नबित्दै स्पीकर न्यान्सी पेलोसीले ट्रम्पलाई संसदमा बार्षिक संवोधनको निम्ता दिएकी छिन् । ट्रम्पलाई स्टेट अफ द युनियन सम्बोधनको निम्ता दिइएको हो ।
आगामी फरबरी ४ मा अमेरिकी संसदको संयुक्त अधिवेशन सुरु हुनु अगाडि ट्रम्पलाई राष्ट्रपतिले गर्ने बार्षिक सम्बोधनका लागि निम्ता दिइएको हो । उक्त समयमा अमेरिकी सिनेटमा महाअभियोगबारेको परीक्षण चलिरहेको वा सकिएको हुनेछ ।
राष्ट्रपतिले गर्ने बार्षिक सम्बोधनका क्रममा प्रतिनिधिसभाका सभामुखले राष्ट्रपतिको पछाडि बस्नुपर्ने प्रावधान रहेको छ । जसअनुशार संसदको तल्लो सदनबाट महाअभियोग पारित गरिएका राष्ट्रपतिको पछाडि बसेर सम्भवत पेलोसीले ताली बजाउनेछिन् ।
बार्षिक सम्बोधनका लागि निम्ता दिंदै पेलोसीले तीन पेज लामो पत्र पठाएकी छिन् । पत्रमा संविधानको सम्मान गर्ने स्पीरिटका साथ पत्र पठाइएको उल्लेख गरिएको छ । पत्रमा शुभेच्छासहित लेखेर हस्ताक्षर गरिएको छ ।
पेलासीका तर्फबाट पठाइएको पत्र अमेरिकी राष्ट्रपति ट्रम्पले शुक्रबार स्वीकार गरिसकेका छन् । ट्रम्पले पेलोसीलाई ६ पेज लामो पत्र लेखेर महाअभियोगको विरोध गरे लगत्तै पेलोसीले सम्बोधनका लागि पत्र पठाएकी हुन् ।
सभामुखका रुपमा पेलासीलाई राष्ट्रपतिको सम्बोधनको समय निर्धारण गर्ने अधिकार रहेको छ । सन् २०१९ को सम्बोधन पेलोसीले सरकार शटडाउनका कारण पछाडि सारिदिएकी थिइन् । लगत्तै ट्रम्पले अफगानिस्तान र ब्रसेल्स भ्रमणका क्रममा पेलासीलाई सैन्य जहाज प्रयोग गर्नबाट रोक लगाएका थिए ।