आज अमेरिकी राष्ट्रपतिबिरुद्ध महाअभियोग लगाउँदै, यस्तो छ प्रकृया
प्रकाशित मिति : पुस २, २०७६ बुधबार
आज अमेरिकी राष्ट्रपति डोनाल्डबिरुद्ध अमेरिकी संसदको तल्लो सदनले महाअभियोग लगाउँदैछ । हाउसमा ट्रम्पबिरुद्ध तयार पारिएका महाअभियोगका दुईवटा दस्तावेजमा मतदान हुने भएको छ ।
आज विहान १० बजेदेखि ११ बजेसम्म महाअभियोग लगाउने नियममा मतदान हुनेछ । त्यसपछि झण्डै ६ घण्टासम्म महाअभियोगका लागि तयार पारिएका दुईवटा दस्तावेजमा छलफल हुने जनाइएको छ ।
उक्त छलफलपछि हाउसमा मतदानका लागि महाअभियोग दस्तावेजहरु लगिने छ । तर मतदान हुँदासम्म आजराती हुने अनुमान गरिएको छ । डेमोक्र्याट्सहरुको बहुमत रहेको हाउसबाट महाअभियोगका दस्तावेजहरु सहजै पारित हुने अपेक्षा गरिएको छ ।
महाअभियोग मतदानपछि महाअभियोग मेनेजर छनौटका लागि मतदान हुनेछ । मतदान अगाडिको ६ घण्टा लामो बहसमा डेमोक्र्याट्सहरु र रिपब्लिकनहरुका लागि बराबर समय बाँडिएको छ ।
यसैबीच अमेरिकी राष्ट्रपति डोनाल्ड ट्रम्पले ट्वीट गर्दै भनेका छन् तपाई विश्वास गर्नुहुुन्छ ? मलाई आज अतिवादी डेमोक्र्याट्सहरुले महाअभियोग लगाउँदैछन् । मैले केही गलत गरेको छैन ।
अमेरिकी इतिहासमा कालो दिन
आज अमेरिकी संसदको तल्लो सदनबाट अमेरिकी राष्ट्रपति डोनाल्ड ट्रम्पलाई महाअभियोग लगाईदैछ । जुन अमेरिकी इतिहासकै कालो दिन हुनेछ । अमेरिकाको साढे २ सयबर्ष इतिहासमा राष्ट्रपति ट्रम्प महाअभियोग लगाइने तेश्रो राष्ट्रपति हुनेछन् ।
शक्तिको दुरुपयोग गरेको अभियोगमा अमेरिकाका ४५ औं राष्ट्रपतिलाई अमेरिकी संसदको तल्लो सदनमा महाअभियोग लगाईदैछ । राष्ट्रपति ट्रम्पले प्रतिनिधिसभाकी सभामुख न्यान्सी पेलोसीलाई एक आक्रमक पत्र पठाएका छन् ।
प्रतिनिधिसभाको पूर्ण सदनमा मतदान हुनुभन्दा एकदिन अगाडि मंगलबार ट्रम्पले ६ पृष्ठ लामो पत्र पठाएका हुन् । कोहीपनि बुद्धिमान व्यक्तिले डेमोक्र्याट्सहरुको कुरा विश्वास नगर्ने ट्रम्पले पत्रमा उल्लेख गरेका छन् ।
पत्रका मुख्य बुंदाहरु यस्ता छन्
– यस महाभियोगले डेमोक्र्याट सांसदहरूबाट अभूतपूर्व र असंवैधानिक शक्तिको दुरुपयोगको प्रतिनिधित्व गर्दछ ।
– तपाईहरुले धेरै कुरूप शब्दको महाभियोगलाई सस्तो बनाउनुभयो ।
– तपाईंको अमान्य महाभियोगको प्रक्रियालाई अघि बढाउँदै, तपाईंले आफ्नो शपथ पदको उल्लंघन गरिरहनु भएको छ । तपाईं संविधानप्रतिको निष्ठा तोड्दै हुनुहुन्छ, र अमेरिकी अमेरिकी प्रजातन्त्रविरुद्ध खुला युद्धको घोषणा गर्दै हुनुहुन्छ।
– तपाईले अमेरिकाका संस्थापकहरुलाई अपमान गर्नेभन्दा पनि नराम्रो, तपाईले अमेरिकी जनताको विश्वासलाई निरन्तर अपमान गर्दै हुनुहुन्छ । जबकि तपाईलाई नकारात्मक रुपले अभिप्रेरित नभएसम्म यी आरोपहरु सत्य होइनन् भन्ने थाहा छ ।
– तपाईंलाई राम्ररी थाहा छ कि उपराष्ट्रपति बाइडेनले आफ्नो कार्यालय र १ अरब डलर अमेरिकी सहयोगको पैसा दुरुपयोग गरेर आफ्ना छोरालाई लाखौं डलर भुक्तानी गरिरहेका अभियोजनकर्तालाई हटाउनका लागि प्रयोग गरेका थिए ।
– अहिले तपाईंहरु जो बाइडेनले आफूले स्वीकारेको कुरामा मलाई गलत तरिकाले आरोपित गरेर महाअभियोग लगाउन खोज्दै हुनुहुन्छ ।
– राष्ट्रपति ज़ेलेन्स्कीले बारम्बार घोषणा गर्नुभएको छ कि मैले केही गल्ती गरेको छैन, र त्यहाँ कुनै दबाब छैन।
– तपाईंले अमेरिकामा प्रजातान्त्रिक तवरले चुनिएका राष्ट्रपतिमाथि नक्कली अनुसन्धान गर्नुभयो।
– जब म विदेशी देशहरूसँग कुरा गर्छु, त्यहाँ धेरै व्यक्तिहरू अनुमतिसहित नै कुराकानीको दुबै तिरको आवाज सुन्दै हुन्छन् ।
– अमेरिकी चुनावमा हस्तक्षेप त तपाईहरु गर्दै हुनुहुन्छ। तपाईले अमेरिकाको प्रजातन्त्रलाई उल्टाउन खोज्दै हुनुहुन्छ।
– फोन कल सार्वजनिक गरिए पछि तपाईको सबै कथा हावामा उड्यो तर तपाइहरुलाई निरन्तरताबाट भने रोक्न सकेन ।
– म यो पत्र तपाईंलाई ईतिहासको उद्देश्यको लागि लेख्दैछु र मेरो विचारलाई स्थायी र अमिट रेकर्डमा राख्छु।
अमेरिकी राष्ट्रपति ट्रम्पको पत्रको पूर्ण पाठ
महाअभियोग प्रस्ताबका दुईवटा आर्टिकलहरुमध्ये एउटामा ट्रम्पले शक्तिको दुरुपयोग गरेर आफ्ना राजनीतिक प्रतिद्धन्दीमाथि अनुसन्धानका लागि युक्रेनलाई दवाव दिएको तथा अमेरिकी सुरक्षा सहायता र ह्वाइट हाउसको बैठक रोकेको आरोप लगाइएको छ । अर्कोमा गवाहहरुलाई रोकेर अनुसन्धानमा बाधा हालेको तथा उपस्थीतिका लागि दिइएको सुचना अवज्ञा गरेको आरोप लगाइएको छ ।
अब यी दुईवटै आर्टिकलहरु प्रतिनिधिसभामा मतदानमा लागि लगिने भएको छ । यदि प्रतिनिधिसभामा साधारण बहुमतबाट यो पारित भएमा ट्रम्प अमेरिकी इतिहासमा औपचारिक रुपमा महाअभियोग लगाइएका तेश्रो राष्ट्रपति हुनेछन् । यस अगाडि न्यायायिक समितिबाट महाअभियोग प्रस्ताव अगाडि बढेपछि रिचार्ड निक्सनले राजिनामा दिएका थिए ।
तल्लो सदनबाट पारित भएपछि अमेरिकी सिनेटमा सर्बोच्च अदालतका प्रधानन्यायाधिसको अध्यक्षतामा यसबारे परीक्षण हुनेछ । हाउसबाट पारित भएपनि महाअभियोग प्रस्ताव सिनेटबाट पारित हुने सम्भावना भने न्यून रहेको छ ।