न्युयोर्क म्यानहटनमा १३ बर्षका केटाको समुहबाट गाँजा किन्न गएकी किशोरीको यसरी हत्या
प्रकाशित मिति : मंसिर ३०, २०७६ सोमबार
न्युयोर्कमा गाँजा किन्न म्यानहटन पार्कमा गएकी १८ बर्षीयालाई १३ बर्षका टिनएजरको समुहले हत्या गरेको खुलासा भएको छ । स्लेन बर्नाड कलेजकी विद्यार्थी समेत रहेकी टेसा मेजरको म्यानहटन पार्कमा चक्कु प्रहारबाट हत्या भएको थियो । उनी त्यहाँ गाँजा किन्न गएको अनुसन्धानबाट खुलेको छ ।
बुधबार बेलुका ७ बजे स्कुल नजिकैको मोर्निंगसाइड पार्कमा गएको बेला उनीमाथि टीनएजरको एउटा समुहले आक्रमण गरेको थियो । लुटपाटमा संलग्न उक्त समुहले टेसा मेजरमाथि आक्रमण गरेका थिए । एकजना सेक्युरिटी गार्डले फोन गरेपछि घटनास्थल पुगेको प्रहरीले उनलाई तत्काल अस्पताल लगेपनि बचाउन भने सकेनन् ।
घटनापछि अनुसन्धानका क्रममा घटनास्थल पुगेको प्रहरीले नजिकैको स्टोरमा सोध्दा त्यहाँका कामदारले टीनएजरको समुहले आक्रमण गरेको हुनसक्ने बताएका थिए । किनभने उक्त समुहले ५ दिन अगाडि पनि एकजना टीनएजर केटीमाथि आक्रमण गरेका थिए ।
ती केटीमाथि १३ बर्षको समुहका केटाहरुले आक्रमण गरेर भुईमा लडाएका थिए । तर उनले एकजना महिलाले केटाहरुको फोटो खिचेर तत्काल प्रहरीलाई खबर गरेपछि उनीहरु त्यहाँबाट भागेका थिए । अहिले १८ बर्षीयाको हत्यामा पनि तिनै केटाहरुको आंशका गर्दै अनुसन्धानकर्ताहरुले अनुसन्धानको सुरुवात गरेका थिए ।
प्रहरीले उनीहरुलाई पक्राउ गरिसकेको छ भने १३ बर्षको केटालाई टेसा मेजरको हत्याको अभियोग लगाएको छ । त्यस्तै प्रहरीले अर्को एकजना १४ बर्षको केटालाई पनि हिराशतमा लिएको छ । तेश्रो केटाभने अहिलेसम्म फरार रहेको छ ।
केटाहरुले आक्रमणगरेपछि टेसा मेजरले प्रतिरोध समेत गरेकी थिइन् । उनले केटाहरुको औंलामा समेत टोकेकी थिइन् । जुन कुरा अदालती सुनुवाईका क्रममा खुलासा भएको छ । अदालतमा पेश गरिएको १३ बर्षको केटाले दुईजनाले टेसा मेजरको हत्या गरेको र आफूले केबल हेरेको बयान दिएको थियो ।
शुक्रबारको सुनुवाई अदालतले १३ बर्षको उक्त केटालाई विना जमानत हिराशतमा राख्न आदेश दिएको छ । आक्रमणकारीहरु कम उमेरका भएका कारण उनीहरुको नाम सार्वजनिक गरिएको छैन ।
सुरुमा ती केटाहरुले पार्क नजिक अर्कै व्यक्तिलाई लुट्ने योजना बनाएका थिए । तर पछि उनीहरुले टेसा मेजरलाई देखेपछि उनलाई आक्रमण गरेर लुटपाट गर्ने योजना बनाएका थिए । सुरुमा टेसा मेजरको घाँटी अठ्याएर उनको खल्तीबाट सामानहरु निकालेका थिए । र पछि चक्कु हानेका थिए ।
त्यसपछि उनीहरु वालेट लिएर त्यहाँबाट भागेका थिए । घटनास्थलमा चार इन्चको फोल्ड गर्न मिल्ने ब्लेड भेटिएको थियो । जहाँ आक्रमणकारीको फिंगरप्रिन्ट समेत थियो । बिहिबार प्रहरीले १३ बर्षको केटालाई नियन्त्रणमा लिएपछि आक्रमणबारे सबै खुलासा भएको हो । आगामी मंगलबार उसलाई पुन अदालतमा पेश गरिने भएको छ ।
