लण्डन ब्रिजमा चक्कु हान्ने २८ बर्षको उस्मान खान, पहिले जेल बसेर जीपीएसमा छाडिएको व्यक्ति
प्रकाशित मिति : मंसिर १३, २०७६ शुक्रबार
लण्डनको लण्डन ब्रिजमा चक्कु आक्रमण गर्ने व्यक्तिको पहिचान प्रहरीले सार्वजनिक गरेको छ । आक्रमणकारी २८ वर्षीय उस्मान खान भएको प्रहरीले जनाएको छ । खानलाई सन् २०१२ मा एउटा आतंकवादी आक्रमणमा दोषी ठहर गरिएको थियो भने सन् २०१८ को डिसेम्बरमा जीपीएस लगाएर छाडिएको थियो ।
सन् २०१० मा लण्डन स्टक एक्सचेन्जमा बम राख्ने योजना बनाएको अभियोगमा उस्मानलाई सन् २०१२ देखि ८ बर्ष जेल हालिएको थियो ।
उस्मान खानले लण्डन ब्रिजमा गरेको चक्कु आक्रमणमा दुईजनाको मृत्यु भएको छ भने अरु कैयन घाइते भएका छन् । प्रहरीको गोली लागेर आक्रमणकारी उस्मान खानको पनि मृत्यु भएको छ ।
यसैबीच न्युयोर्कमा मेयर बिल डे ब्लाजिओले न्युयोर्करका तर्फबाट समवेदना व्यक्त गरेका छन् । न्युयोर्क सिटीले लण्डनले भोगेको पीडाको अनुभव गर्नसक्ने बताउँदै उनले ट्वीटरमार्फत समवेदना व्यक्त गरेका छन् ।
लण्डन ब्रिजमा स्थानीय समय अनुशार दिउसोको २ बज्न लाग्दा चक्कु प्रहारको घटना भएको थियो । प्रहरीले आतङ्कवादी घटनाका रुपमा घटनाको अनुसन्धान गरिरहेको छ ।
प्रधानमन्त्री बोरिस जन्सनले ट्वीट गर्दै आफूले उक्त घटनाबारे लगातार जानकारी लिइरहेको भन्दै प्रहरी तथा आपतकालीन सेवा प्रदायकहरूलाई धन्यवाद दिएका छन्। घटनापछि लण्डन ब्रिजलाई प्रहरीले बन्द गराएका थिए ।
२ बर्ष अगाडि पनि लण्डन ब्रिज र नजिकै भएको घटनामा ८ जनाको मृत्यु भएको थियो । त्यतीबेला ४८ जना घाइते भएका थिए ।