पाकिस्तानी पूर्वप्रधानमन्त्री सरिफलाई जमानतमा रिहा गर्न आदेश
प्रकाशित मिति : कार्तिक ८, २०७६ शुक्रबार
पाकिस्तानका पूर्वप्रधानमन्त्री नवाज सरिफलाई जमानतमा रिहा गर्न अदालतले शुक्रबार आदेश दिएको छ ।
भ्रष्टाचारको अभियोगमा जेल सजाय भोगीरहको समय सरिफ विरामी भएर उपचारका लागि अस्पतालमा राखिएको वेला अदालतले जमानतमा रिहा गर्न आदेश दिएको हो ।
स्वास्थ्य अवस्था विग्रिएर कमजोर भएपछि उहाँलाई केहीदिन अगाडि उपचारका लागि अस्पतालमा लगिएको थियो । उहाँको अहिले अस्पतालमै उपचार भइरहेको छ ।
लाहोरको उच्च अदालतले तीन पटक मुलुकको प्रधानमन्त्री हुनुभएका व्यक्ति विरामी भएर अस्पतालमा उपचार गराईरहेका बेला कैदीभन्दा पनि स्वतन्त्र पूर्वक उपचार गर्न सघाउने उद्देश्यले यस्तो आदेश दिएको बताइएको छ ।
सन् २०१७ देखि कारागारमा रहनुभएका सरिफलाई अदालतले एक करोड रुपैँया जमानत तोकेको छ । उहाँलाई अनिश्चितकालका लागि रिहा गर्न आदेश दिइएको हो ।
उपचारमा संलग्न चिकित्सकहरुले पूर्वप्रधानमन्त्री सरिफको अवस्था चिन्ताजनक भएको पुष्टि गरेपछि अदालतले उहाँले रिहा गर्नुपर्ने निश्कर्ष निकालेको एक अधिकारीले बताएका छन् ।
चिकित्सकहरूले सरिफको रगतमा समस्या देखिएको र त्यसले शारीरिक अवस्था विगँ्रदै गएको बताएका छन् । सरिफलाई कहाँ राखेर उपचार गराउने भन्नेबारेमा अझै निधो भैनसकेको बताइएको छ ।
अदालतको आदेशमा सात बर्षे जेल सजाय भोगीरहनु भएका ६९ बर्षीय सरिफलाई गत मङ्लबार कारागारबाट अस्पताल लगिएको हो ।
पाकिस्तानका प्रधानमन्त्री इमरान खानले बन्दी जीवन बिताइरहेका पूर्वप्रधानमन्त्री सरिफको स्वास्थ्यमा समस्या देखिएको थाहा पाएपछि उपचारको व्यवस्था गर्न लगाउनुभएको थियो ।
प्रधानमन्त्री खानले सरिफलाई सम्भव भएसम्मको राम्रो उपचार सेवा दिन पनि सरोकारवाला सवैलाई निर्देशन दिनुभएको छ ।
“पूर्वप्रधानमन्त्री सरीफको स्वास्थ्यमा जटिल समस्या देखिएको छ । यतिबेला उहाँको स्वास्थ्य लाभको कामना गर्दछु,” प्रधानमन्त्री खानले ट्वीटरमा लेख्नुभएको छ ।
पूर्वप्रधानमन्त्री सरिफ जेल चलान भएपछि पाकिस्तान मुस्लिम लिग — नवाज (पीएमएल—एन)को नेतृत्व समेत लिनुभएका उहाँका भाइ शहबाजले सामाजिक सञ्जाल ट्वीटर मार्फत् सरिफको स्वास्थ्यका बारेमा ध्यानाकर्षण गराउनुभएको थियो ।
पाकिस्तानको सर्वोच्च अदालतले उहाँलाई भ्रष्टाचारी ठहर गर्दै राजनीतिमा आजीवन अयोग्यसमेत हुनेगरी सात बर्ष जेल सजायको फैसला गरेको थियो ।
सरिफले भने आरोपलाई अस्वीकार गर्नुभएको छ । उहाँले राजनीतिक पूर्वाग्रहका आधारमा आफुलाई दोषी देखाइएको बताउदै आउनुभएको छ ।