अष्ट्रेलियामा ट्याक्स ठगी गर्ने भारतीय विद्यार्थीलाई दुई वर्षभन्दा बढीको जेल सजाय
प्रकाशित मिति : फाल्गुन २४, २०७५ शुक्रबार
अष्ट्रेलियामा ट्याक्स ठगी गर्ने एक भारतीय विद्यार्थीलाई दुई वर्षभन्दा बढीको जेल सजाय भएको छ । उनले १ लाख डलर भन्दा बढी ट्याक्स ठगी गरेको भेटिएको हो ।
थरुण लिक्की मेलबर्नमा कम्प्युटर नेटवर्किंगका विद्यार्थी हुन् । उनले भारतबाट अष्ट्रेलियामा पढ्नको लागि गैरकानुनी तरिकाले भिसा लिएका विद्यार्थीहरुको भिसा विवरण लिए । त्यसपछि उनले ती भिसा विवरणबाट ट्याक्स फाइल नम्बर बनाए र ट्याक्स रिटर्नको लागि पेश गरे ।
उनले जुलाई २०१३ मा २२ हजार १ सय ८० डलर र अक्टोबर २०१४ देखि अक्टोबर २०१५ मा १ लाख १७ हजार ५ सय ४० डलरको रिफण्डको लागि पेश गरेका थिए । त्यसको लागि उनले आफ्नो दाइ र साथीको विवरण प्रयोग गरेको बताइएको छ । जसले गर्दा रिफण्ड दाइ र साथीकै बैंक खातामा जान्थ्यो । र, पैसा गइसकेपछि ती खाताबाट थरुणले आफ्नो खातामा त्यो रकम ट्रान्सफर गर्थे ।
सुचनाको आधारमा ट्याक्स अफिस, प्रहरी, बोडर फोर्स, कमवेल्थ डाइरेक्टरको संयुक्त अनुसन्धानबाट यो ठगी प्रकरण बाहिर आएको थियो ।
ठगी प्रमाणित भएपछि थरुण लीक्कीलाई दुई वर्ष तीन महिनाको जेल सजाय दिइएको छ ।