भर्जिनिया दुर्घटनामा ज्यान गुमाएका दुई नेपाली युवाको दाहसंस्कार र श्रद्धाञ्जली
प्रकाशित मिति : फाल्गुन १४, २०७५ मंगलबार
फरबरी १६ मा अमेरिकाको भर्जिनियाको फेयर फ्याक्स काउन्टी अन्तर्गत डुलास अन्तर्राष्ट्रिय बिमानस्थलको पूर्वपट्टी राजमार्ग २८ मा भएको दुर्घटनामा ज्यान गुमाएका दुई नेपाली युवाको आज दाहसंस्कार गरिएको छ । दुर्घटनामा २९ बर्षका सुबीद सिंह र २८ बर्षका अन्जिल थापाको घटनास्थल मै मृत्यु भएको थियो ।
भर्जिनियाको डेलसिटीमा आजदिउसो उनीहरुको दाहसंस्कार गरिएको छ । दाहसंस्कारपछि भर्जिनियाको दुर्गा मन्दिरमा मैनबत्ति प्रज्ववलन र श्रद्धाञ्जली समेत आयोजना गरिएको छ । दिउसो ४ बजेदेखि सुरुभएको श्रद्धाञ्जली र मैनबत्ति प्रज्जवल साँझसम्म चलेको थियो ।
गत शनिबार ज्यान गुमाउने सुबीदले गत जनवरीमा मात्र आफ्नो २९ औं जन्मदिन मनाएका थिए । डान्सरबाबुका रुपमा चिनिने अन्जिल नाचगानमा रुची राख्थे ।
दुबै जना नर्दन भर्जिनिया कम्युनिटी कलेजमा अध्ययनरत थिए । सुबीद सिल्भर डाइनरमा मेनेजरका रुपमा काम गर्थे भने अञ्जिल आईनोभा अस्पतालमा कार्यरत थिए ।
फरबरी १६ मा बिहान साढे ४ बजे उक्त दुर्घटना भएको थियो । उनीहरु सवार होन्डा सीआरभी गाडी बिजुलीको पोलमा ठोकिएको थियो । घटना स्थलमै गाडी जलेको कारण सुरुमा मृतकको सनाखत हुनमा समस्या भएको थियो ।
उनीहरुको दाहसंस्करका लागि गोफण्डमीमा रकम संकलन अभियान चलाइएकोमा ३० हजार डलर संकलन भएको छ । दाहसंस्कारसम्मको खर्चबाट बचेको रकम दुबैको परिवारलाई आधाआधा प्रदान गरिने भएको छ । जसबाट १३ दिने काजकृया लगायतका अन्य कर्मका लागि परिवारलाई मद्दत पुग्नेछ ।