२०१७ मा ३८५ विदेशीहरुको भिसा नवीकरण नभएको तथ्यांक सार्वजनिक
प्रकाशित मिति : आश्विन १३, २०७५ शनिबार
गत वर्ष जापान बसिरहेका ३ सय ८५ जना विदेशी बसोबास अनुमतिबाट बञ्चित भएको अर्थात भिसा नवीकरण नभएको तथ्यांक सार्वजनिक भएको छ । जापानमा शंकास्पद गतिविधिको संख्यामा भएको वृद्धिका कारण यस्तो भएको यहाँको न्याय मन्त्रालयले बताएको छ । नियमअनुसार तोकिएको काम नगरेका विदेशीहरु समेत यसमा छन् ।
बसोबास अनुमति पाउन बञ्चित भएकाको संख्या अघिल्लो वर्षको तुलनामा ३१ प्रतिशतको वृद्धि भएको हो भने यो सन् २००५ यताकै सबैभन्दा धेरै रहेको बताइएको छ । यसमा रेसिडेण्ट स्टेसस नपाउने विद्यार्थीको संख्या दोब्बरले बढेको तथ्यांकले देखाएको छ । यसले कुल संख्याको ४४ दशमलव ७ प्रतिशत हिस्सा ओगटेको पाइएको छ ।
गत वर्षको मे सम्ममा जापानमा विदेशी विद्यार्थीको संख्या अघिल्लो वर्षको तुलनामा २७ हजार ७ सय ५५ ले बढेर २ लाख ६७ हजार ४२ मा उक्लिएको जापान विद्यार्थी सेवा संस्थाको तथ्यांकले देखाएको छ । यति मात्रै नभई स्कूलबाट निकालिसकिएको अवस्थामा पनि उनीहरु जापानमै बसिरहेको समेत पाइएको बताइन्छ ।
यसरी बसोबास अनुमति नपाउने जापानी नागरिकका पति वा पत्नी वा बालबच्चाको संख्या १७ दशमलव ४ प्रतिशत रहेको छ भने अन्य विदेशीहरुमा भियतनामी नागरिकको संख्या सबैभन्दा धेरै अर्थात ४६ दशमलव ५ प्रतिशत रहेको छ । त्यस्तै चिनियाँ र फिलिपिनोको संख्या क्रमशः २१ दशमलव ८ प्रतिशत र ७ दशमलव ८ प्रतिशत रहेको तथ्यांक छ ।
केही विदेशीहरुले उनीहरुलाई काममा राख्ने कुनै योजना नभएका कम्पनीको नामबाट समेत स्टेटस लिएको भेटिएको माइनिची सिन्बुनले लेखेको छ ।
जापानमा श्रम अभाव चर्केसँगै सरकारले बढी भन्दा बढी विदेशी विद्यार्थी र कामदार जापान ल्याउने तयारी गरे यता गैरकानूनी रुपमा जापान बसेकाहरुमाथि पनि कारवाही गर्ने तयारी तिब्र पारिएको बुझिन्छ ।
गत वर्षको अक्टोबर महीनासम्म जापानमा विदेशी नागरिकको १२ लाख ८० हजार पुगेको स्वास्थ्य, श्रम र कल्याणकारी मन्त्रालयले सार्वजनिक गरेको तथ्यांकले देखाएको छ ।