भाउ घटायो भने निगम डुब्छ -आपूर्तिमन्त्री यादव
प्रकाशित मिति : जेष्ठ २१, २०७५ सोमबार
सरकारले पेट्रोलियम पदार्थको गरिएको मूल्य वृद्धिसँगै चौतर्फी रुपमा नागरिकको दैनिकीमा असर परिरहेकाबेला मूल्य बृद्धिको बचाउ गरेको छ ।
पेट्रोलियम पदार्थमा भएको मूल्य बृद्धिले सरकारको साधारण खर्चदेखि सर्वसाधारणको दैनिकीमा असहजता थपिरहेका बेला उद्योग वाणिज्य तथा आपूर्तिमन्त्री मात्रिका यादवले नेपालबाट भारतमा तेल तस्करी भइरहेको भन्दै यसको बचाउ गर्नु भएको छ ।
आजको संसद बैठकमा मन्त्री यादवले भारतमा भन्दा पेट्रोल २२ रुपैयाँ र डिजेल २५ रुपैयाँ सस्तो रहेकाले तेल तस्करी भइरहेको बताउदै अझै तेल घट्दा आयल निगम डुब्ने भन्दै मूल्य बृद्धिको बचाउ गर्नु भयो । मूल्यवृद्धिपछि पनि आयल निगमलाई ३७ करोड रुपैयाँ घाटा रहेको उहाले बताउनु भयो ।
नेपाल आयल निगमले हवाई इन्धन अन्तारिकतर्फ प्रतिलिटर ५ रुपैयाँको दरले मूल्य बढाएकै दिन रुट अनुसार करिब २ सय २० रुपैयाँसम्म हवाई भाडा पनि बढेको छ ।
हवाईजहाजको भाडा बढ्दा त्यसले प्रत्यक्ष असर दुर्गम जिल्लाका नागरिक तथा सार्वजनिक तथा ढुवानीका साधनमा पर्ने हुदा खाद्यान्न, तरकारीलगायत अत्यावश्यक वस्तुको ढुवानीमा असर परि नागरिकले महंगीको मार खेप्नु परेको छ ।