क्रिकेट टोलीका सदस्यलाई जनही ३ लाख
प्रकाशित मिति : फाल्गुन ७, २०७४ सोमबार
विश्वकप छनोट प्रतियोगितामा पुग्न सफल राष्ट्रिय क्रिकेट टोलीलाई सरकारले जनही ३ लाख रुपियाँ पुरस्कार दिने घोषणा गरेको छ।
सोमवार प्रधानमन्त्री निवास बालुवाटारमा विजेता टोलीको स्वागत गर्दै प्रधानमन्त्री केपी ओलीले उक्त घोषणा गरेको टोलीका मेनेजर रमण शिवाकोटीले बीबीसीलाई बताए।
त्यसैगरी मदन भण्डारी स्पोर्ट्स एकेडेमीले पनि टोलीका सदस्यलाई जनही एक लाख रुपियाँ थपिदिने घोषणा गरेको शिवाकोटीले बताए।
यात्रा
शुक्रवार नेपाली टोली विश्वकप छनोट खेल्न जिम्बाब्वे जान लागेको हुनाले सोही दिन प्रधानमन्त्री ओलीले टोलीलाई विदाई गर्ने र पुरस्कार वितरण गर्ने बताइएको छ।
जिम्बाब्वेमा हुने छनोट प्रतियोगितामा समुह बी मा नेपाल सहित अफगानिस्तान, स्कटल्याण्ड, जिम्बाब्वे र हङकङ रहेका छन्।
गतहप्ता नामिबियामा भएको विश्व क्रिकेट लिग डिभिजन २ को उपविजेता बन्दै राष्ट्रिय क्रिकेट टोली अर्को महिना हुने एकदिवसिय विश्वकपको छनोट प्रतियोगिता खेल्न योग्य भएको थियो।
सो प्रतियोगितामा नेपालले समुह चरणमा नामिबिया, युएई, केन्या र क्यानाडालाई पराजित गर्दै समूह विजेताको रुपमा उत्कृष्ट २ मा प्रवेश गरेको थियो। फाइनलमा भने नेपाली टोली युएईसंग पराजित भएको थियो।
BBC Nepali
