स्थायी नेतृत्वविहीन बन्दै अमेरिकी संघीय निकाय, व्हाइट हाउसको निर्देशनबिनै सिनेटरहरूको दौडधुप
सिनेटमा डेमोक्रेटिक बहुमत आउनुअघि नै करिब सय रिक्त शीर्ष पद पूर्ति गर्न रिपब्लिकन सिनेटरहरू सक्रिय बनेका छन्। तर, समय घर्किँदै जाँदा पनि व्हाइट हाउसबाट स्पष्ट मार्गदर्शन नआएको सिनेटरहरूले बताएका छन्।
Photo: Simon Gagner/ Unsplash
आगामी वर्ष डेमोक्रेटिक पार्टीले सिनेटको नियन्त्रण लिनुअघि नै राष्ट्रपति डोनाल्ड ट्रम्पद्वारा मनोनित अधिकारीहरूलाई अनुमोदन गराउन रिपब्लिकन सिनेटरहरू सक्रिय भएका छन्। यद्यपि, समय घर्किँदै जाँदा यस विषयमा व्हाइट हाउसबाट स्पष्ट मार्गदर्शन प्राप्त नभएको उनीहरूले गुनासो गरेका छन्।
सिनेटर बिल क्यासिडी ट्रम्पका मनोनित व्यक्तिहरूलाई अनुमोदन गराउने विषयमा व्हाइट हाउसबाट के-कस्तो जानकारी आएको छ भनी सोध्दा “केही पनि छैन, पटक्कै छैन” भन्ने जवाफ दिए। त्यसैगरी सिनेटर र्यान्ड पलले पनि यस मुद्दामा व्हाइट हाउससँग “कुनै संवाद नभएको” बताए।
गैर-दलीय सरकारी अनुसन्धान समूह ‘पार्टनरसिप फर पब्लिक सर्भिस’ का अनुसार १५ वटा क्याबिनेट विभागअन्तर्गतका करिब ३०० सिनेट-अनुमोदित नेतृत्व पदहरूमध्ये झन्डै १०० पद रिक्त छन्। ती रिक्त पदमध्ये २९ वटामा मात्र मनोनयन विचाराधीन छ। कार्यकालको अन्तिम दुई वर्षमा दुवै सदनमा डेमोक्रेटिक बहुमत रहने भएकाले रिक्त पदको संख्या अझै बढ्ने अनुमान गरिएको छ।
यस अवस्थाले संघीय सरकारका अधिकांश निकायहरू ट्रम्पका सीमित वफादारहरूको भरमा चल्नुपर्ने स्थिति सिर्जना गर्नेछ, जसले एजेन्सीहरूमा थप दबाब बढाउनुका साथै राष्ट्रपतिको एजेन्डा अघि बढाउन कठिनाइ थप्ने देखिएको छ।
केही उच्च प्राथमिकताका पदहरूमा अझै मनोनयनसमेत भएको छैन। मार्चमा अर्थमन्त्री स्कट बेसेन्टको कार्यवाहक प्रमुखको कार्यकाल सकिएयता ट्रम्पले आन्तरिक राजस्व सेवाको प्रमुखमा कसैलाई तोकेका छैनन्। खाद्य तथा औषधि प्रशासन पनि स्थायी नेतृत्वविहीन छ, जहाँ ट्रम्पको पछिल्लो छनोट हेइडी ओभर्टनको नाम मंगलबार फिर्ता लिइएको थियो।
व्हाइट हाउसले भने सिनेटमा पठाइएका मनोनयनहरू अघि बढाउन कडा प्रयास भइरहेको र सिनेट नेतृत्वसँग निरन्तर सम्पर्कमा रहेको दाबी गरेको छ। गत साता ट्रम्पले सामाजिक सञ्जाल ‘ट्रुथ सोसल’ मा २५ संघीय न्यायाधीशसहित विचाराधीन रहेका सबै १६१ मनोनयन अनुमोदन गर्नु “अत्यन्त महत्वपूर्ण” रहेको उल्लेख गरेका थिए।
सेप्टेम्बरको बिदाअघि सिनेटले ट्रम्पका ७४ जना गैर-सैनिक मनोनित व्यक्तिहरूको समूहलाई एकमुष्ट अनुमोदन गरेको थियो। रिपब्लिकन नेतृत्वले डिसेम्बरमा अर्को एकमुष्ट अनुमोदन प्याकेज ल्याउने तयारी गरिरहेको छ। गत वर्ष सिनेटको नियम परिवर्तन गरी साधारण बहुमतबाट एकैपटक धेरै पद अनुमोदन गर्न सकिने बनाइए पनि संघीय न्यायाधीश र मन्त्रिपरिषद् सदस्यहरूको हकमा भने छुट्टाछुट्टै मतदान हुनुपर्छ।
एक प्रशासनिक अधिकारीले नाम नखुलाउने सर्तमा यस वर्ष मनोनयन अनुमोदन गराउन “हतास हुनुपर्ने अवस्था नरहेको” बताए। उनका अनुसार ट्रम्प प्रशासनसँग स्थायी नेतृत्वबिना नै काम गरेको विगतको अनुभव छ र रिपब्लिकनहरूले जो बाइडेनको कार्यकालमा जुली सुले करिब दुई वर्ष कार्यवाहक श्रममन्त्रीका रूपमा काम गरेको उदाहरणसमेत प्रस्तुत गर्ने गरेका छन्।
सिनेटका बहुमत नेता जोन थुनले बुधबार “सिनेटको अनुमोदनको कुनै विकल्प नहुने” बताउँदै राष्ट्रपति ट्रम्पले जर्ज वासिङ्टनलाई नै मनोनयन गरे पनि डेमोक्रेटहरूले अवरोध गर्ने टिप्पणी गरे। थुनको कार्यालय व्हाइट हाउससँग नियमित सम्पर्कमा रहेको एक सहयोगीले जानकारी दिए।
तर, सिनेटर सिन्थिया लुमिसले जनवरीपछि डेमोक्रेटहरूले मनोनयन प्रक्रिया ठप्प पार्ने बताउँदै “एजेन्सीहरूलाई दुई वर्षसम्म नेतृत्वविहीन छोड्नु गैरजिम्मेवारीपूर्ण हुने” धारणा राखिन्।
अर्कोतर्फ, केही डेमोक्रेट सांसदहरू अयोग्य व्यक्तिलाई स्थायी नियुक्ति दिनुभन्दा पद खाली राख्नु नै उचित हुने तर्क गर्छन्। कनेक्टिकटका डेमोक्रेटिक सिनेटर रिचर्ड ब्लुमेन्थलले “अक्षम वा भ्रष्ट स्थायी नियुक्तिकर्ताभन्दा कार्यवाहक अधिकारी नै कम खतरनाक हुने” बताए। तर, विश्लेषकहरूका अनुसार स्थायी नेतृत्व नहुँदा रक्षामन्त्री पिट हेग्सेथ र स्वास्थ्यमन्त्री रोबर्ट एफ. केनेडी जुनियरजस्ता बहालवाला मन्त्रीहरूलाई आफ्नो एजेन्डा लागू गर्न थप स्वतन्त्रता मिल्नेछ। गत साता एक कार्यक्रममा केनेडीले “सिनेटसँग अब ममाथि कुनै दबाब दिने शक्ति छैन, र यो ठूलो कुरा हो” भनेका थिए।
भ्यान्डरबिल्ट विश्वविद्यालयका राजनीतिशास्त्रका प्राध्यापक डेभिड लुइसले सिनेटबाट अनुमोदित व्यक्ति नहुँदा व्हाइट हाउसलाई सिधै नीतिनिर्माण गर्न सहज हुने र अधिकारको प्रतिस्पर्धा नहुने बताए।
विशेषगरी रक्षा र जस्टिस डिपार्टमेन्टमा रिक्तताको समस्या गम्भीर देखिएको छ। सिनेटको सशस्त्र सेवा समितिले मंगलबार नौसेना सचिवका लागि ट्रम्पका विवादास्पद छनोट हङ काओको सुनुवाइ गरेको छ भने सेनाको शीर्ष पदका लागि जनरल क्रिस लानेभको नाम सिफारिस गरिएको छ। तर, दुवैको अनुमोदन सहज देखिएको छैन। समितिका अध्यक्ष सिनेटर रोजर विकरले वर्षको अन्त्यसम्म सबै पद पूर्ति गर्ने आशा व्यक्त गरे पनि समयको चाप रहेको स्वीकार गरे।
जस्टिस डिपार्टमेन्टमा हालैको राजीनामाको लहरपछि ११ शीर्ष पदमध्ये जम्मा ३ वटामा मात्र सिनेटबाट अनुमोदित स्थायी नेतृत्व रहने अवस्था छ। उपमहान्यायाधिवक्ताको पदसमेत कार्यवाहकको भरमा छ। जस्टिस डिपार्टमेन्टकी प्रवक्ता किर्स्टन पेल्सले कार्यवाहक अधिकारीसँग पनि स्थायी सरहकै अधिकार रहने दाबी गरिन्। महान्यायाधिवक्ता टोड ब्लान्चले मध्यावधि चुनावपछि कर्मचारी बाहिरिनु सामान्य प्रक्रिया भएको बताए।
यसैबीच, सिनेटर क्यासिडीले वैज्ञानिक पृष्ठभूमि नभएको भन्दै डेमोक्रेट र वैज्ञानिक समूहहरूको विरोधपछि ‘नेसनल साइन्स फाउन्डेसन’ को प्रमुखमा मनोनित जिम ओ’निलमाथिको मतदान स्थगित गरेका छन्। दुवै दललाई स्वीकार्य हुने योग्य व्यक्ति खोज्न सकिने बताउँदै उनले स्थायी नेतृत्वबिना एजेन्सी चल्नु चिन्ताको विषय भएको उल्लेख गरे।





