३ मंसिर २०८३, बिहिबार| Thursday, November 19, 2026
अन्तर्राष्ट्रिय

विश्वकप अघि आप्रवासन नीतिको समीक्षा गर्न संयुक्त राष्ट्र संघको आग्रह

photo: Fauzan Saari/Unsplash

विश्वकप फुटबल सुरु हुन ठीक एक दिन अगाडि संयुक्त राष्ट्र संघका मानव अधिकार प्रमुख भोल्कर टर्कले विशेष गरी अमेरिकाको आप्रवासन नीतिमा व्यापक परिमार्जन गर्न आह्वान गरेका छन् । प्रतियोगिताको अवधिमा नश्लीय भेदभाव,कडा निगरानी र आप्रवासन प्रवर्तन जस्ता विषयहरूले पार्न सक्ने नकारात्मक प्रभावप्रति उनले गम्भीर चिन्ता व्यक्त गरेका हुन् ।

बिहीबारदेखि सुरु हुने ४८ राष्ट्र सम्मिलित ३९ दिने यस महाकुम्भ अगावै केही विवादास्पद घटनाहरू सार्वजनिक भइसकेका छन् । इरानको टोलीलाई एरिजोनाको प्रशिक्षण क्याम्पबाट मेक्सिको सार्नुपरेको छ भने केही इरानी अधिकारीहरूलाई अमेरिकाले प्रवेश भिसा दिन अस्वीकार गरेको छ ।

सोमालियाका प्रतिष्ठित अफ्रिकी रेफ्री ओमार अर्टानलाई मियामीमा प्रवेश रोकिएको छ भने सेनेगलका एक खेलाडीलाई विमानस्थलको टार्माकमा सुरक्षाकर्मीले खानतलासी गरिरहेको तस्बिरहरू सार्वजनिक भएका छन् ।

जेनेभास्थित राष्ट्र संघको मानव अधिकार नियोगको मुख्यालयमा पत्रकारहरूसँग कुरा गर्दै अस्ट्रियाली वकिल समेत रहेका टर्कले भने, हामीले केही दृश्यहरू देखिसकेका छौँ । म आशा गर्छु कि नश्लीय भेदभाव, निगरानी र आप्रवासन नियन्त्रणका यी मुद्दाहरूले विश्वकपलाई थप प्रभावित पार्ने छैनन् ।

यो विश्वकप अमेरिका, क्यानडा र मेक्सिकोले संयुक्त रूपमा आयोजना गर्दैछन्, जहाँ १०४ खेलहरूमध्ये अधिकांश खेलहरू अमेरिकामा हुँदैछन् । तर, अमेरिकी राष्ट्रपति डोनाल्ड ट्रम्पको प्रशासन मातहतका संघीय निकायहरूका नीतिहरू मात्र अहिले आलोचनाको केन्द्रमा रहेका छन् ।

मोरक्को र स्कटल्याण्ड जस्ता देशका हजारौँ डलर खर्च गरिसकेका प्रशंसकहरूले यात्रा गर्नु केही दिन अघि मात्रै आफ्नो यात्रा अनुमति रद्द वा अस्वीकृत भएको गुनासो गरेका छन् ।

सोमाली रेफ्री अर्टानको हकमा भने एक अमेरिकी अधिकारीले शङ्कास्पद आतंकवादी संगठनका सदस्यहरूसँग आबद्धता रहेको दाबी गर्दै प्रवेश रोकेको बताएका छन्, यद्यपि यसको कुनै ठोस प्रमाण सार्वजनिक गरिएको छैन । फिफाका अध्यक्ष जियानी इन्फान्टिनोले विगत १८ महिनामा ट्रम्प प्रशासनसँग नजिकको सम्बन्ध बनाए पनि फिफाले आफ्नै रेफ्रीको रक्षा गर्न सकेन ।

मानव अधिकार प्रमुख टर्कले विश्वव्यापी रूपमा मानिसहरूको आवतजावतलाई लिएर भने, आप्रवासी, शरणार्थी र शरण खोज्नेहरूलाई मानिसको रूपमा व्यवहार नगरिने प्रवृत्तिको अन्त्य हुनुपर्छ । विभाजनकारी र ध्रुवीकरण गर्ने भाष्यबाट कसैलाई फाइदा हुँदैन ।

खसोखासका समाचार नछुटाउनुहोस्Follow Khasokhas for immigration, green card, tax and community news.Facebook मा Follow गर्नुहोस् →
लेखक रमेश फुल्लेल

रमेश फुल्लेलले खसोखासका लागि समसामयिक विषयमा रिपोर्टिङ गर्छन्। नेपालका अनलाइन सञ्चारमाध्यममा रिपोर्टिङको अनुभव बटुलेका उनले राजनीति, अध्यागमन लगायतका विषयमा समाचार लेख्दै आएका छन्। साथै, उनले स्थानीय जनसरोकारका विषयमा समेत रिपोर्टिङ र विश्लेषण प्रस्तुत गर्दै आएका छन्।

यस लेखकका थप समाचार →