न्यूयोर्कमा गायक राजु परियार र गायिका निशा सुनार लगायतको लोकदोहोरी शुक्रबार
प्रकाशित मिति : माघ २१, २०८२ बुधबार
लोक गायक राजु परियार र गायिका निशा सुनारको विशेष प्रस्तुतिसहित न्यूयोर्कमा सांगीतिक तथा सांस्कृतिक कार्यक्रम आयोजना हुने भएको छ।
गोर्खाली समाज न्यूयोर्कको आयोजनामा आगामी फेब्रुअरी ६ तारिख शुक्रबार उडसाइडस्थित ‘द प्यालेस’ मा ‘लोकदोहोरी तथा सांस्कृतिक कार्यक्रम’ हुन लागेको हो।
संस्थाका अध्यक्ष ओम विश्वकर्माका अनुसार प्रवासमा नेपाली मौलिक लोक संस्कृति र पहिचानलाई प्रवर्द्धन गर्ने उद्देश्यले कार्यक्रमको आयोजना गरिएको हो।
कार्यक्रममा राजु परियार र निशा सुनारका साथै चन्द्र शर्मा, बिमल डाँगी, रन्जिता गुरुङ, बसन्ती राई, संगीता थापा मगर, भुपेन्द्र गुरुङ, अमर अनुराग श्रेष्ठ, महादेव त्रिपाठी, दिनेश सुनार र न्हुच्छे डंगोललगायत एक दर्जनभन्दा बढी कलाकारहरूले प्रस्तुति दिनेछन्। कार्यक्रममा प्रत्यक्ष दोहोरीगीत, सांस्कृतिक नृत्य र हास्यव्यंग्यसमेत समावेश छन्।
६३-०१ रुजवेल्ट एभिन्युमा रहेको ‘द प्यालेस’मा हुने कार्यक्रम साँझ ६:३० बजेबाट राति १२:३० बजेसम्म सञ्चालन हुने छ। कार्यक्रमका लागि साधारण टिकट दर ६० अमेरिकी डलर (अपेटाइजर सहित) र भीआईपी टिकट दर १०० अमेरिकी डलर तोकिएको छ।
गोर्खाली समाज न्यूयोर्कले न्यूयोर्क तथा आसपास रहेका नेपाली समुदायलाई कार्यक्रममा उपस्थित हुन आग्रह गरेको छ।