अमेरिकी ऊर्जामन्त्री भन्छन् – भेनेजुएलाको तेल बिक्री र राजस्व नियन्त्रण गर्न आवश्यक
प्रकाशित मिति : पुस २२, २०८२ बुधबार
अमेरिकी ऊर्जामन्त्री क्रिस राइट (फाइल) । तस्वीर : चार्ल्स वाटकिन्स/डिपार्टमेन्ट अफ इनर्जी
अमेरिकाले भेनेजुएलामा आफूले चाहेको राजनीतिक तथा आर्थिक परिवर्तन ल्याउन त्यहाँको तेल बिक्री र त्यसबाट हुने आम्दानीलाई नियन्त्रण गर्नुपर्ने आवश्यकता औँल्याएको छ। अमेरिकी ऊर्जामन्त्री क्रिस राइटले बुधबार अमेरिकाले भेनेजुएलाको तेल उत्पादन, बिक्री र त्यसबाट आउने नगद प्रवाहमाथि नियन्त्रण गरेमा ठूलो दबाब सिर्जना गर्न सकिने बताएका छन्।
मियामीमा आयोजित एक सम्मेलनमा बोल्दै राइटले अमेरिकी सरकारले भेनेजुएलाको तेल अमेरिका तथा विश्व बजारमा बिक्री गर्ने र त्यसबाट उठ्ने आम्दानी अमेरिकाको नियन्त्रणमा रहेका खाताहरूमा जम्मा गरिने स्पष्ट पारे।
उनका अनुसार अहिले अवरुद्ध अवस्थामा रहेको भेनेजुएलाको तेल आपूर्ति पुनः प्रवाहमा ल्याइनेछ। “तेलको प्रवाह, बिक्री र त्यसबाट आउने आम्दानी नियन्त्रणमा लिन सकेमा ठूलो प्रभाव पार्न सकिन्छ ।” उनले भने।
हालै अमेरिकी राष्ट्रपति डोनाल्ड ट्रम्पले पनि अमेरिका भेनेजुएलालाई “नियन्त्रणमा लिने” अभिव्यक्ति दिएका थिए। यस कदमले अमेरिकी ऊर्जा कम्पनीहरूलाई भेनेजुएलाको विशाल तेल भण्डारमा पहुँच मिल्न सक्ने संकेत गरेको छ।
एक समय दैनिक ३५ लाख ब्यारेलसम्म तेल उत्पादन गर्ने भेनेजुएला कमजोर व्यवस्थापन र सीमित वैदेशिक लगानीका कारण पछिल्ला वर्षहरूमा कमजोर बन्दै गएको छ। हाल देशको औसत तेल उत्पादन करिब ११ लाख ब्यारेल प्रतिदिनमा सीमित रहेको बताइएको छ।
राइटका अनुसार अनुकूल वातावरण बनेमा छोटोदेखि मध्यम अवधिमै दैनिक केही सय हजार ब्यारेल अतिरिक्त तेल उत्पादन सम्भव छ। विश्वकै सबैभन्दा ठूलो तेल भण्डार भए पनि भेनेजुएलाले हाल विश्व आपूर्तिमा करिब १ प्रतिशत मात्र योगदान दिँदै आएको छ।
यसैबीच, भेनेजुएलाको कमजोर बनेको तेल क्षेत्र पुनर्जीवित गर्ने उपायबारे छलफल गर्न अमेरिकी तेल उद्योगका अधिकारीहरू यसै साता ह्वाइट हाउस जाने अपेक्षा गरिएको छ।