थप देशमाथि यात्रा प्रतिबन्ध लगाउने अमेरिकाको तयारी, सूची चाँडै सार्वजनिक गरिने
प्रकाशित मिति : मंसिर १६, २०८२ मंगलबार
(डिएचएस फोटो: टिया डुफोर)
अमेरिकाको डिपार्टमेन्ट अफ होमल्यान्ड सेक्युरिटीकी सेक्रेटरी क्रिस्टी नोएमले थप देशहरूमा यात्रा प्रतिबन्ध लगाउने सिफारिस गर्ने बताएकी छिन्। ती देशहरूले अमेरिकालाई आपराधिक गतिविधिले डुबानमा पारेको उल्लेख गर्दै नोएमले आफूले राष्ट्रपति डोनाल्ड ट्रम्पसँग भेटेको र अमेरिकालाई हत्यारा, डाकू र सुविधाका लोभीहरूले डुबानमा पार्ने प्रत्येक देशमाथि पूर्ण यात्रा प्रतिबन्ध लगाउन सुझाव दिने निर्णय गरेको सामाजिक सञ्जालमा पोस्ट गरेकी छिन्।
ट्रम्प र डिपार्टमेन्ट अफ होमल्यान्ड सेक्युरिटीले उनको पोस्टलाई आधिकारिक सामाजिक सञ्जाल खाताहरूमा सेयर गरेका थिए। प्रस्तावित यात्रा प्रतिबन्धले कुनकुन देशहरूलाई असर गर्नेछ वा यो कहिलेदेखि सुरु हुन सक्छ भन्ने स्पष्ट भइसकेको छैन। होमल्यान्ड सेक्युरिटीले यसको सूची चाँडै घोषणा गर्ने जनाएको छ। ह्वाइट हाउसकी प्रेस सेक्रेटरी क्यारोलाइन लेभिटले ट्रम्पले केही महिनाअघि नै तेस्रो विश्व र असफल देशहरूमा यात्रा प्रतिबन्ध घोषणा गरिसकेको र नोएमको सिफारिसले त्यसलाई विस्तार गरी थप राष्ट्रहरूलाई समेट्ने बताएकी थिइन्।
जुन ४ मा ह्वाइट हाउसले आप्रवासनमा पूर्ण वा आंशिक प्रतिबन्धहरूको सामना गर्ने १९ देशहरूको सूची जारी गरेको थियो, जसमा मुख्यतया अफ्रिका, मध्य पूर्व र क्यारिबियनका देशहरू थिए। गत बुधबार वाशिङ्टन डीसीमा दुई नेसनल गार्ड सदस्यलाई गोली हानेको घटनापछि ट्रम्प प्रशासनले अध्यागमनमा थप कडाइका घोषणाहरू गरेको छ। यात्रा प्रतिबन्धबारे टिप्पणी गर्नुअघि नोएमले बाइडेन युगको अपरेसन एलाइज वेलकम कार्यक्रम अन्तर्गत १ लाख अफगान नागरिकहरू अमेरिका प्रवेश गरेका र उनीहरूको छानबिन प्रक्रियाको समीक्षा गर्ने बताएकी थिइन्।
अधिकारीहरूले डीसी गोलीकाण्डका संदिग्ध व्यक्तिलाई एक अफगान नागरिकको रूपमा पहिचान गरेका थिए। उनी उक्त कार्यक्रमको एक हिस्साको रूपमा २०२१ मा अमेरिका प्रवेश गरेका थिए। यो कार्यक्रम २० वर्षको अमेरिकी तैनातीका क्रममा अमेरिकी सेनासँग काम गरेका स्थानीयहरूका लागि बनाइएको थियो। संदिग्ध व्यक्तिलाई अमेरिका आएपछि मानसिक स्वास्थ्य समस्याहरू देखिएको थियो।
डीसी गोलीकाण्डपछि एसाइलम अनुरोधहरूमाथिका सबै निर्णयहरू पनि रोकिएका छन्। युएससीआईएसका निर्देशक जोसेफ एडलोले प्रत्येक विदेशीलाई अधिकतम सम्भव हदसम्म छानबिन र स्क्रिनिङ गर्न सकिने सुनिश्चित नभएसम्म यो स्थगन कायम रहने बताएका छन्। एडलोले १९ देशबाट अमेरिकामा बसाइँ सरेका व्यक्तिहरूलाई जारी गरिएका ग्रीन कार्डहरूको समीक्षा पनि गरिने बताएका छन्।
बिहीबार ट्रम्प आफैंले सबै तेस्रो विश्वका देशहरूबाट स्थायी रूपमा आप्रवासन रोक्ने चेतावनी समेत दिएका थिए। तेस्रो विश्व शब्द विगतमा गरिब, विकासशील राष्ट्रहरूलाई वर्णन गर्न प्रयोग हुँदै आएको थियो। आफ्नो दोस्रो राष्ट्रपतीय कार्यकालको दौरान ट्रम्पले कागजात नभएका आप्रवासीहरूको सामूहिक देशनिकाला गर्ने, शरणार्थी भर्नाको वार्षिक संख्या कटौती गर्ने र जन्मसिद्ध नागरिकताको अधिकार कटौती गर्ने प्रयास गरेका छन्।