पूर्वप्रधानन्यायाधीश कार्कीको नेतृत्वमा नेपालको नयाँ सरकार गठन गर्ने सहमति
प्रकाशित मिति : भाद्र २६, २०८२ शुक्रबार
सुशीला कार्की । तस्वीर स्रोत : विकिपिडिया
पूर्वप्रधानन्यायाधीश सुशीला कार्कीको नेतृत्वमा नेपालको नयाँ सरकार गठन गर्ने सहमति जुटेको छ ।
राष्ट्रपति कार्यालयका अनुसार राष्ट्रपति रामचन्द्र पौडेलले उनलाई आजै प्रधानमन्त्री पदको शपथ खुवाउने तयारी गरेका छन् ।
शुक्रबार राष्ट्रपति निवास शीतल निवासमा भएको राष्ट्रपति पौडेल पूर्व प्रधानन्यायाधीश कार्की, जेनजी अभियन्ता तथा कानुनविद्हरूको छलफलपछि यस्तो सहमति जुटेको हो । नयाँ सरकार गठनका लागि छलफल गर्न शुक्रबार अपराह्न कार्कीसहितको टोली शीतल निवास पुगेको थियो ।
राष्ट्रपति कार्यालयका अनुसार कार्कीलाई आजै ९ बजे शपथ खुवाउने तयारी भइरहेको छ । शीतल निवासमा भएको सहमतिसँगै कार्की नेपालको पहिलो महिला प्रधानमन्त्री बन्ने भएकी हुन् ।