ग्रिनकार्ड वा आप्रवासी भिसा स्पोन्सरका लागि स्पोन्सरकर्ताको आम्दानीको मापदण्ड बढाइदै
प्रकाशित मिति : माघ ५, २०८१ शनिबार
Photo by Karolina Grabowska on Pexels.com
परिवारमा आधारित ग्रिनकार्ड वा आप्रवासी भिसा स्पोन्सरका लागि स्पोन्सरकर्ताको आम्दानी गतबर्षको तुलनामा बढी हुनुपर्ने प्रावधान ल्याउने तयारी गरिएको छ । डिपार्टमेन्ट अफ हेल्थ एण्ड ह्युमन सर्भिसले पोभर्टी गाइडलाइन अपडेट गरेको छ भने आगामी केही दिनमा युएससीआइएसले यसको आधारमा स्पोन्सरकर्ताको आम्दानीको स्तर निर्धारण गर्ने अपेक्षा गरिएको छ ।
अहिलेसम्म अलास्का र हवाई बाहेक ४८ राज्यमा बस्नेहरुका सन्दर्भमा यदि स्पोन्सरकर्ताले कसैलाई स्पोन्सर गर्नुपर्ने भएमा उसको बार्षिक आम्दानी कम्तीमा २५ हजार ५ सय ५० डलर भन्दा माथि हुनुपर्ने प्रावधान रहेकोमा अब छिट्टै युएससीआईएसले यो रकम २६ हजार ४ सय ३७ डलर ५० सेन्टस भन्दा बढी हुनुपर्ने प्रावधान ल्याउने अपेक्षा गरिएको छ ।
डिपार्टमेन्ट अफ हेल्थ एण्ड ह्युमन सर्भिसले शतप्रतिशत पोभर्टी गाइडलाइनको रकम २ जनाको परिवारका लागि २१ हजार १ सय ५० कायम गरेको छ, जुन २०२४ को २० हजार ४ सय ४० डलर भन्दा बढी हो । एकजना भन्दा बढी स्पोन्सर गर्नेहरुको सन्दर्भमा वा परिवारमा एकजनाभन्दा बढी हुनेहरुको सन्दर्भमा भने आम्दानीको मापदण्ड प्रतिव्यक्ति ६ हजार ८ सय ७५ डलर थप्दै जानुपर्छ । कसैलाई स्पोन्सर गर्नका लागि पोभर्टी गाइडलाइनको १२५ प्रतिशत भन्दा माथि आम्दानी हुनुपर्ने भएकाले स्पोन्सरकर्ताको आम्दानीको मापदण्डमा परिवर्तन हुने भएको हो ।
स्पोन्सरकर्ता अमेरिकी सेनामा रहेको छ र उसले दम्पत्ति वा छोराछोरीलाई स्पोन्सर गर्नुपर्ने छ भने पोभर्टी गाइडलाइनको १ सय प्रतिशतमात्र आम्दानी भए पुग्छ । अर्थात् २१ हजार १ सय ५० डलरसम्म आम्दानी भएको एकल व्यक्तिले एकजनालाई स्पोन्सर गर्नसक्छ ।
युएससीआइएसले गतबर्ष नयाँ मापदण्ड मार्च १ बाट लागु गरेको थियो । यो बर्षपनि त्यही सेरोफेरोमा लागु गर्ने अपेक्षा गरिएको छ । अर्थात् अहिले नै स्पोन्सर गर्नेहरुका लागि सन् २०२४ को मापदण्ड अनुशार नै आम्दानी भए पुग्छ । अलास्का र हवाई राज्यमा बस्नेहरुका सन्दर्भमा यो रकम अलग्गै रहेको छ ।
तोकिएको आम्दानी हुने व्यक्तिले भिसा वा ग्रिनकार्डका लागि स्पोन्सर गर्न सक्छ । खासगरी फर्म आई ८६४ भर्दा न्यूनतम आम्दानीको मापदण्ड पूरा गरेको हुनुपर्छ । यसरी स्पोन्सर गरिएको व्यक्तिले १० बर्षभित्र अमेरिकामा आएर सरकारी सुविधा लिएमा त्यसको क्षतिपूर्ति स्पोन्सरकर्ताबाट अमेरिकी सरकारले लिनसक्ने कानुनी प्रावधान रहेको छ ।
अलास्का र हवाईमा हुनेहरुका लागि भने अन्य राज्यको तुलनामा बढी आम्दानी भएको हुनुपर्छ । हवाईमा हुनेहरुको तुलनामा अलास्कामा हुनेहरुको तुलनामा अझ बढी आम्दानी हुनुपर्ने प्रावधान रहेको छ ।
अमेरिकामा विभिन्न प्रकारका आप्रवासी भिसामा आउनका लागि दुई प्रकारका स्पोन्सर फर्मको आवश्यकता पर्छ । सामान्यतया परिवारमा आधारित भिसाका लागि स्पोन्सरकर्ताले आई ८६४ नामको स्पोन्सर फर्म भर्नुपर्छ भने रोजगारमा आधारित, डिभी लोटरी र मंगेतर भिसा के वानका लागि आई १३४ नामको स्पोन्सर फर्म भर्नुपर्छ ।
स्पोन्सरकर्ताले आई ८६४ नामको स्पोन्सर फर्म भर्दा आम्दानीको मापदण्ड पोभर्टी गाइडलाइनभन्दा १२५ प्रतिशतमाथि हुनुपर्छ भने आई १३४ नामको स्पोन्सर फर्म भर्दा पोभर्टी गाइडलाइनभन्दा एकसयप्रतिशतमाथि भए पुग्छ । अर्थात् आई १३४ फर्म भरेर स्पोन्सर गर्दा कम आम्दानी भए पुग्छ ।
फर्म आई ८६४ भर्ने स्पोन्सरकर्ताले स्पोन्सर गरिएको व्यक्ति अमेरिकामा आएर सरकारी सुविधा खाएमा त्यसको क्षतिपूर्ति सरकारलाई तिर्नुपर्ने हुनसक्छ भने आई १३४ स्पोन्सरमा त्यस्तो बाध्यता नहुनसक्छ ।