विश्वका शक्तिशाली पासपोर्टको तुलनामा नेपालको पासपोर्ट गतबर्षको तुलनामा कमजोर
प्रकाशित मिति : पुस २५, २०८१ बिहीबार
विश्वका शक्तिशाली पासपोर्टको तुलनामा नेपालको पासपोर्ट गतबर्षको तुलनामा कमजोर देखिएको छ । बुधबार सार्वजनिक हेन्ले पासपोर्ट सूचकांक अनुशार नेपालको पासपोर्ट विश्वका शक्तिशाली पासपोर्टहरुको सुचीमा १०१ नम्बरमा परेको छ । गतबर्ष नेपालको पासपोर्ट ९८ नम्बरमा रहेकोमा यो बर्ष तल खस्केर १०१ मा झरेको हो ।
नेपाली पासपोर्टमा विनाभिसा यात्रा गर्न सकिने गन्तव्यको संख्या ३९ रहेको र गतबर्ष यो संख्या ४० रहेको सुचकांकले देखाएको छ । २०२३ मा भने नेपालको पासपोर्ट १०३ नम्बरमा र २०२२ मा १०५ नम्बरमा रहेको थियो । २०२१ मा भने ११० नम्बरमा रहेको थियो । यद्यपी २०१८, २०१९ र २०२० मा नेपालको पासपोर्ट १०१ नम्बरमा नै रहेको थियो । २०१७ मा ९७ नम्बरमा र २०१६ मा ९८ नम्बरमा रहेको थियो ।
नेपाल केबल सोमालिया, यमन, पाकिस्तान, इराक, सिरिया र अफगानिस्तानभन्दामात्र अगाडि रहेको छ । पाकिस्तान र यमन दुबै १०३ नम्बरमा रहेकाले नेपाल विश्वका कमजोर पासपोर्टहरुमा छैठौं नम्बरमा रहेको छ । बंगालादेश, उत्तर कोरिया, सुडान, श्रीलंका, इरान लगायतका देशका पासपोर्टले पनि नेपालको पासपोर्टलाई उछिनेका छन् ।
विश्वमा सबैभन्दा शक्तिशाली पासपोर्ट भने सिगापुरको रहेको छ । सिगापुरको पासपोर्ट वाहकलाई १९५ गन्तव्यमा जान भिसा फ्रि रहेको छ । त्यस्तै दोश्रोमा जापान, तेश्रोमा फिनल्याण्ड, फ्रान्स, जर्मनी, इटली, दक्षिण कोरिया र स्पेन रहेका छन् । चौथोमा अष्ट्रिया, डेनमार्क, आयरल्याण्ड, लक्जेम्बर्ग, नेदरल्याण्ड, नर्वे र स्वीडेन रहेका छन् । पाँचौंमा बेल्जियम, न्युजिल्याण्ड, पोर्चुगल, स्वीट्जरल्याण्ड र यूके रहेका छन् ।
छैठौं नम्बरमा रहेका छन् अष्ट्रेलिया र ग्रिस । सातौं नम्बरमा भने क्यानडा, माल्टा र पोल्याण्ड छन् । आठौं नम्बरमा चेकिया र हंगेरी छन् भने अमेरिका र इस्टोनिया नवौं नम्बरमा छन् । दशौं नम्बरमा रहेका छन् लाटभिया, लिथुवानिया, स्लोभेनिया र युएई ।