अमेरिकी नागरिकता अन्तरवार्तामा बदलिँदैछन् यी प्रश्नहरुको जवाफ
प्रकाशित मिति : पुस ८, २०८१ सोमबार
अमेरिकी नागरिकताको अन्तरवार्तामा विभिन्न प्रश्नहरुको उत्तरहरु बदलिंदैछन् । गत नोभेम्बरमा सम्पन्न चुनावका कारण अमेरिकी नागरिकता अन्तरवार्तामा सोधिने केही प्रश्नका जवाफहरु बदलिदै छन् ।
अमेरिकी नागरिकता अन्तरवार्तामा सोध्न सकिने तपाईको राज्यको एकजना सिनेटरको नाम भन्नुहोस् ? भन्ने प्रश्नको जवाफ आगामी जनवरी ३ पछि बदलिनसक्छ । किनभने नोभेम्बरमा ३३ वटा सिनेटको सिटका लागि चुनाव भएको थियो भने थप सिनेटको १ सिटका लागि विशेष चुनाव भएको थियो । एरिजोना, क्यालिफोर्निया, डेलावर लगायतका कैयन राज्यमा नयाँ सिनेटरहरु निर्वाचित भएका छन् ।
आफ्नो राज्यबाट प्रतिनिधित्व गर्ने सिनेटरको नाम थाहा पाउन यहाँ क्लिक गर्नुहोला । अनि वेवसाइटको सुरुमा रहेको ‘फाइण्ड योर सिनेटर’मा क्लिक गर्नुहोला ।
त्यस्तै तपाईको डिस्ट्रिक्टबाट प्रतिनिधित्व गर्ने अमेरिकाको प्रतिनिधिसभा सदस्यको नाम के हो ? भन्ने प्रश्नको जवाफ जनवरी ३ पछि पनि बदलिनसक्छ । किनभने नोभेम्बरको चुनावबाट कैयन नयाँ अनुहारहरु पनि निर्वाचित भएका छन् । त्यसका लागि तपाईले यो वेवसाइटमा गएर आफ्नो क्षेत्रको जीप कोड हाल्नुहोला ।
तपाईको राज्यको गभर्नरको नाम के हो ? भन्ने प्रश्नको जवाफ पनि बदलिन सक्छ । नोभेम्बरमा ११ राज्य र २ अमेरिकन टेरेटोरीमा भएको चुनावमा निर्वाचित हुने नयाँ अनुहारहरु पनि रहेका छन् । तपाईले आफ्नो राज्यको गभर्नर थाहा पाउन यो लिंकमा क्लिक गर्नुहोला ।
अमेरिकी राष्ट्रपति को हुन् ? भन्ने प्रश्नको जवाफ पनि आगामी जनवरी २० मा बदलिनेछ । जनवरी २० पछि अमेरिकी राष्ट्रपतिमा डोनाल्ड ट्रम्पले पदभार ग्रहण गर्नेछन् । त्यस्तै अमेरिकी उपराष्ट्रपति को हुन् ? भन्ने प्रश्नको जवाफ पनि जनवरी २० मा नै बदलिनेछ । जनवरी २० पछि अमेरिकी उपराष्ट्रपतिमा जेडी भान्सले पदभार ग्रहण गर्नेछन् ।
अमेरिकी राष्ट्रपतिको राजनीतिक दल कुन हो ? भन्ने प्रश्नको जवाफ पनि आगामी जनवरी २० मा बदलिनेछ । जनवरी २० पछि उक्त प्रश्नको जवाफ रिपब्लिकन पार्टी हुनेछ ।
अमेरिकी नागरिकता अन्तरवार्तामा जवाफ बदलिन सक्ने प्रश्नहरु यस्ता रहेका छन् । जसको जवाफ अमेरिकामा हुने चुनावी परिणाम र अन्य परिघटनासँगै बदलिन सक्छ ।