पत्रकार महासङ्घमा पहिलोपल्ट महिला नेतृत्व , कोषाध्यक्षमा विष्ट प्यानलका अधिकारी निर्वाचित
प्रकाशित मिति : मंसिर ३०, २०८१ आईतबार
नेपाल पत्रकार महासङ्घको अध्यक्षमा निर्मला शर्मा विजयी हुनुभएको छ ।
महासङ्घको केन्द्रीय निर्वाचन समितिले आइतबार अबेर सार्वजनिक गरेको मतपरिणामअनुसार शर्माले ४ हजार २ सय ८२ मत प्राप्त गरी निर्वाचित हुनुभएको हो । उहाँका निकटतम प्रतिद्वन्द्वी रमेश विष्टले ३ हजार २ सय तीन मत प्राप्त गर्नुभयो ।
अध्यक्षका अर्का उम्मेदवार देवीप्रसाद सापकोटाले २ सय ७० र लालसिंह लामाले ९६ मत प्राप्त गर्नुभयो । वरिष्ठ उपाध्यक्षमा दीपक आचार्यले ४ हजार दुई सय ३० मत प्राप्त गरी निर्वाचित हुँदा निकतम प्रतिस्पर्धी रोशन पुरीले २ हजार आठ सय ८६ मत प्राप्त गर्नुभयो ।
उपाध्यक्ष महिलामा नितु पण्डितले ४ हजार ७ सय पाँच मत प्राप्त गरी विजयी हुँदा गङ्गा पौडेल बरालले २ हजार ६ सय ४४ मत प्राप्त गर्नुभयो ।
उपाध्यक्ष समावेशीमा उमिदप्रसाद बागचन्दले ४ हजार दुई सय ९२ मत प्राप्त गरी विजयी हुनुभयो । उहाँका निकतम प्रतिद्वन्द्वी सुभाषप्रसाद साहले २ हजार ८० मत प्राप्त गर्नुभयो ।
महासचिवमा रामप्रसाद दाहालले ४ हजार ८४ मत प्राप्त गरी विजयी हुँदा निकतम प्रतिद्वन्द्वी लेखनाथ न्यौपानेले १ हजार नौ सय २९ मत प्राप्त गर्नुभयो ।
सचिव खुलामा रमेश खतिवडाले ३ हजार चार सय मत प्राप्त गरी जित निकाल्नुभयो ।
सचिव महिलामा सोनी शर्माले ४ हजार तीन सय ४७ मत प्राप्त गरी विजयी हुनुभयो ।
त्यस्तै, सचिव आदिवासी जनजातिमा सविन प्रियासनले ३ हजार पाँच सय ३५, सचिव मधेशीमा अशोककुमार तिवारीले तीन हजार आठ सय ५८ मत प्राप्त गरी विजयी हुनुभयो ।
सचिव दलिततर्फ प्रकाश धौलाकोटीले ४ हजार एक सय १०, सचिव एशोसिएटतर्फ बैकुण्ठराज पराजुलीले तीन हजार छ सय ४५ मत प्राप्त गरी जित हासिल गर्नुभयो ।
कोषाध्यक्षतर्फ रामकृष्ण अधिकारीले ३ हजार आठ सय ४७ मत प्राप्त गरी विजयी हुनुभयो । कोशी प्रदेशतर्फबाट केन्द्रीय सदस्यमा कमल रिमाल र शङ्कर खरेल मधेस प्रदेश सदस्यमा राजु विश्वकर्मा र राजेशकुमार कर्ण बिजयी हुनुभयो ।
बागमती उपत्यका बाहेकका केन्द्रीय सदस्यमा नवराज पथिक र नारायणप्रसाद अधिकारी गण्डकी प्रदेश सदस्यमा कृष्ण केसी र केवी राना लुम्बिनी प्रदेश सदस्यमा रामराज पोखरेल र विकास बन्जाडे कर्णाली प्रदेश सदस्यमा तुलाराम पाण्डे र नगेन्द्रप्रसाद उपाध्याय बिजयी हुनुभएको छ ।
सुदूरपश्चिम प्रदेश सदस्यमा योगेन्द्रबहादुर बलायर र सुरेश पन्त उपत्यका प्रदेश सदस्यमा अर्जुन पन्त र सूर्य सुवेदी प्रतिष्ठान प्रदेशतर्फ वीरेन्द्र ओली र सविता शर्मा विजयी हुनुभयो ।
संस्थागत प्रदेश (एशोसिएट) तर्फ पवित्रा मुडभरी र मनुका कुँवर बिजयी हुनुभएको छ । खुला सदस्यमा छविलाल तिवारी भूपेन्द्र आचार्य मुकुन्दप्रसाद भण्डारी रामेश्वर कार्की र लवदेव ढुङ्गाना बिजयी हुनुभएको छ ।
मधेसी महिलातर्फ रुवीकुमारी रौनियार र आदिवासी जनजाति महिलातर्फ माला पालुङ्वा खस आर्य महिलामा लिला शाह योगी बिजयी हुनुभयो । दलित महिलातर्फ भने यसअघि नै रीता बुढाथोकी निर्विरोध निर्वाचित हुनुभएको थियो । दलित सदस्यमा सिकेन्द्र पासवान र दलित सदस्यमा सावित्री रसाइली निर्वाचित हुनुभयो ।
आदिवासी जनजाति सदस्यमा भरत जर्घा मगर आदिवासी महिला सदस्यमा देविका घर्ती मगर निर्विरोध निर्वाचित हुनुभएको थियो ।
मधेसी सदस्यमा राजकरण महतो मधेसी सदस्य महिलामा ललिताकुमारी साह निर्वाचित हुनुभयो । अपाङ्गता भएका सदस्यमा भूपराज बस्याल अल्पसङ्ख्यक सदस्यमा लक्ष्मण थामी विजयी हुनुभयो ।
लेखा समिति संयोजकमा केसी लामिछाने निर्वाचित हुँदा सोही समितिको सदस्य खुलामा केशवप्रसाद बोहरा सदस्य महिलामा रुक्मिणि पोखरेल बिजयी हुनुभयो । नयाँ नेतृत्व चयनका लागि महासङ्घको निर्वाचन यही मंसिर २८ गते भएको थियो ।