अमेरिकाको कामदारभिसामा आधुनिकीकरण गर्ने नियम संघीय समीक्षाको चरणमा
प्रकाशित मिति : मंसिर २८, २०८१ शुक्रबार
अमेरिकाको कामदार भिसा एचवान बीमा आधुनिकीकरणका लागि महत्त्वपूर्ण परिमार्जन गर्ने अपेक्षा गरिएको अन्तिम नियम अब फेडरल अफिस अफ म्यानेजमेन्ट र बजेटमा समीक्षा अन्तर्गत रहेको छ । जसका कारण यो नियम प्रकाशन र कार्यान्वयनको एक कदम नजिक पुगेको छ ।
अन्तिम नियमका प्रावधानहरु प्रकाशन नभएसम्म गोप्य राखिएको छ तर नियमले कामदार भिसा एचवानबीको विशिष्ट पेशाको परिभाषालाई परिमार्जन गर्न खोजेको छ । त्यस्तै कामदार भिसा एचवान बीमा स्टाटस पर्खाइमा रहेका एफ वान भिसामा रहेका विद्यार्थीहरूको लागि क्याप ग्याप सुरक्षा बलियो बनाउने अपेक्षा गरिएको छ ।
त्यस्तै युएससीआईएसको साइट भिजिट अधिकारलाई बलियो बनाउने र गैरआप्रवासी याचिकाहरू परिमार्जन गर्नका लागि प्रक्रिया र आवश्यकताहरूलाई सुव्यवस्थित गर्ने समेत अपेक्षा छ । एजेन्सीको पुरानो स्वीकृतिहरूको नीतिलाई अन्य प्रावधानहरूसँग संहिताबद्ध गर्ने तथा अन्तिम नियमले प्रस्तावमा केही प्रावधानहरू समावेश गर्न सक्ने समेत अपेक्षा छ ।
बाइडेन प्रशासनले २०२३ मा एचवानबी कार्यक्रम र सम्बन्धित कार्यक्रमहरूको व्यापक आधुनिकीकरणको प्रस्ताव राखेको थियो । नियमनको पहिलो चरणमा क्याप दर्ता प्रणाली र चिठ्ठालाई सम्बोधन गरिएको थियो, जुन यो वर्षको मार्चमा लागू भयो। नियमनको दोस्रो चरणले एचवान बी भिसाका योग्यता मापदण्डमा धेरै महत्त्वपूर्ण परिवर्तनहरू लागू गर्न सक्छ भने रोजगारदाताका दायित्वहरू अपडेट गर्न सक्छ ।
केही परिमार्जनहरूले परिभाषामा थप लचिलोपन प्रस्तुत गर्ने तर केहीले योग्यतालाई कम गर्न सक्नेछन् । विशेष गरी नियमले सामान्य रूपमा स्नातक डिग्री चाहिने पेशाको मतलब सधैँ स्नातक डिग्री चाहिने नभएको स्पष्ट पार्नसक्छ । त्यस्तै प्रस्तावित नियमले आवश्यक डिग्री क्षेत्र कामसँग सीधा सम्बन्धित हुनुपर्ने व्यवस्था गर्नसक्छ । प्रस्तावले अफसाइट कामहरूको लागि नयाँ नियमन पनि खोजेको छ ।
फेडरल अफिस अफ म्यानेजमेन्ट र बजेटमा समीक्षापछि यो नियम कार्यान्वयन मितिको साथ फेडरल रजिष्ट्ररमा प्रकाशित गरिनेछ। यद्यपि नियमको प्रकाशन समय अझै थाहा छैन, प्रकाशन पछि ३० दिनको कार्यान्वयन मिति सम्भव छ। बाइडेन प्रशासनको अन्तिम महिनाहरूमा नियमलाई अन्तिम रूप दिने भएकाले यो आगामी ट्रम्प प्रशासन द्वारा निलम्बन समेत हुन सक्छ।