बाइडेन कार्यकालको अन्तिम वर्ष २०२४ मा चार्टर्ड विमानबाट दोब्बर नेपाली देशनिकाला
प्रकाशित मिति : मंसिर १५, २०८१ शनिबार
अमेरिकी राष्ट्रपति जो बाइडेनको कार्यकालमा १ सयजनाभन्दा बढी नेपालीलाई अमेरिकाबाट विमान चार्टड गरेर देशनिकाला गरिएको तथ्यांक इमिग्रेशन एण्ड कस्टम इन्फोर्समेन्ट आइसले सार्वजनिक गरेको छ । बाइडेनले कार्यभार सम्हाल्नु अगाडिका ४ महिनामा १५ जना र त्यसपछि सन् २०२४ को जुनसम्मका झण्डै साढे ३ बर्षमा ११४ जना नेपालीहरुलाई अमेरिकाबाट विमान चार्टड गरेर देशनिकाला गरिएको आइसको तथ्यांकमा उल्लेख छ ।
गत आर्थिक बर्ष २०२४ को ९ महिनामा ४६ जना नेपालीहरुलाई अमेरिकाबाट विमान चार्टड गरेर देशनिकाला गरिएको छ । जुन अघिल्लो आर्थिक बर्ष २०२३ को पूरै १२ महिनाको तुलनामा दोब्बर हो । आर्थिक बर्ष २०२३ मा २२ जना नेपालीहरुलाई आइसले चार्टड विमानमार्फत देशनिकाला गरेको थियो ।
त्यस्तै आर्थिक बर्ष २०२२ मा २८ जना नेपालीहरुलाई आइसले चार्टड विमानमार्फत अमेरिकाबाट देशनिकाला गरेको थियो । आर्थिक बर्ष २०२१ मा २३ जना नेपालीहरुलाई चार्टड विमानमार्फत अमेरिकाबाट देशनिकाला गरिएकोमा बाइडेनले कार्यभार सम्हालेपछि ७ जना नेपालीहरुलाई अमेरिकाबाट चार्टड विमानमा देशनिकाला गरिएको थियो ।
यो संख्यामा अमेरिकी अध्यागमन अदालतबाट देशनिकालाको आदेश पाएर स्वेच्छिक रुपमा अमेरिका छाड्नेहरुको संख्या समावेश छैन । यो आइसको हिराशतमा बसेर आइसकै खर्चमा अमेरिकाबाट देशनिकाला हुनेहरुको विवरण हो । ट्रम्पको कार्यकालको अन्तिम बर्ष २०२० मा ९७ जना नेपालीहरुलाई अमेरिकाबाट देशनिकाला गरेर नेपाल पठाइएको थियो ।
उनीहरुमध्ये प्राय मेक्सिकोबाट गैर कानुनी रुपमा अमेरिका छिर्ने प्रयास गर्दा सीमाक्षेत्रमा समातिएकाहरु हुन् । आइसले पक्राउपछि केहीसमय जेलमा राखेर नेपाल फिर्ता पठाएको हो ।
आर्थिक बर्ष २०१९ मा आइसले अमेरिकाबाट १६२ जना नेपालीहरुलाई देशनिकाला गरेर नेपाल पठाएको थियो । त्यस्तै आर्थिक बर्ष २०१८ मा ४५ जना नेपालीहरुलाई आइसले अमेरिकाबाट देशनिकाला गरेर नेपाल पठाएको थियो । आर्थिक बर्ष २०१७ मा पनि यो संख्या ४५ नै थियो । आर्थिक बर्ष २०१६ मा भने २५ जना नेपालीहरुलाई आइसले अमेरिकाबाट देशनिकाला गरेर नेपाल पठाएको थियो ।
आर्थिक बर्ष २०१५ मा २३ जना नेपालीहरुलाई आइसले अमेरिकाबाट देशनिकाला गरेर नेपाल पठाएको थियो । त्योभन्दा अगाडि २०१४ मा ४४ जना नेपालीहरुलाई आइसले अमेरिकाबाट देशनिकाला गरेर नेपाल पठाएको थियो ।
अमेरिकामा आइसको देशनिकालामा पर्ने यी नेपालीहरु दलाललाई हजारौं डलर बुझाएर विनाभिसा मेक्सिकोबाट अमेरिका छिर्नेहरु हुन् । यीमध्ये कतिपयले जोखिमपूर्ण यात्राका लागि १ लाख डलरसम्म खर्च गर्ने गरेका छन् ।