अमेरिका छिराउने क्रममा एकैपरिवारका ४ को मृत्युको घटनामा रमनलाल मानवतस्करीमा दोषी ठहर
प्रकाशित मिति : मंसिर ८, २०८१ शनिबार
क्यानडाबाट अमेरिका आउन खोज्ने पटेल परिवारका ४ जनाको चिसोले मृत्यु भएको घटनामा अमेरिकाको मिनेसोटाको एक जूरीले हर्षकुमार रमनलाल पटेल र स्टिभ एन्थोनी सान्डलाई मानव बेचबिखन, आपराधिक षड्यन्त्र लगायत सबै मुद्दामा दोषी ठहर गरेको छ । दुबैले पटेल परिवारको मृत्युको सम्बन्धमा आरोपमा दोषी नभएको बताएका थिए ।
केही घण्टाको छलफलपछि शुक्रबार मिनेसोटाको अदालतमा निर्णायक मण्डलले फैसला सुनाएको हो । दुई जनालाई पछिको मितिमा सजाय सुनाइनेछ। उनीहरू प्रत्येकले ५५ वर्षसम्म जेल सजाय भोग्नेछन् ।
३९ वर्षीय जगदीश पटेल, ३७ वर्षीया वैशालीबेन पटेल र उनीहरूका छोराछोरी ११ वर्षीया छोरी विहांगी र तीन वर्षीय छोरा धार्मिकको शव क्यानाडा प्रहरीले जनवरी २०२२ मा फेला पारेको थियो। अमेरिकी सीमाबाट १२ मिटर नजिक मनिटोबा मैदानमा जमेको अवस्थामा उनीहरुको शव फेला पारिएको थियो ।
दोषी ठहर गरिएका हर्षकुमार रमनलाल पटेल मृतक पटेल परिवारसँग सम्बन्धित नभएको जनाइएको छ । तर उनी मानव तस्करीका मुख्य आयोजक थिए । दोषी ठहर अर्का व्यक्ति शान्डलाई अमेरिका प्रवेश गरेपछि परिवार र अन्य आप्रवासीहरूलाई पिकअप गर्ने योजना बनाएकोमा पक्राउ गरिएको थियो। दोषी ठहर गरिएका मानवतस्कर राजिन्दर पाल सिंहले पनि साक्षीका रुपमा बयान दिएका थिए । उनले मानिसहरूलाई ब्रिटिश कोलम्बिया र वाशिंगटन राज्य बीचको अमेरिका क्यानडा सीमा पार गर्न मद्दत गरेका थिए।
सिंहका अनुशार मृतक पटेल परिवार अर्को कथित तस्कर फेनिल पटेलसँग सम्पर्कमा थियो, जो टोरन्टोमा बस्छन् । पटेल परिवारको परिवारको मृत्युको लागि भारतीय प्रहरीले फेनिल पटेलमाथि आरोप लगाएको थियो। फेनिल पटेलपनि मृतक पटेल परिवारसँग सम्बन्धित नभएको र उनले पटेल परिवारलाई क्यानाडाको भिसा दिने व्यवस्था गरेको थियो जनाइएको छ ।
अर्का साक्षी २३ वर्षीय यश पटेल थिए । मृतक परिवारसँग उनको पनि पारिवारिक सम्बन्ध थिएन । उनी मृतक पटेल परिवारसँग अमेरिका जाँदै थिए। उनले आफू र अन्य आप्रवासीहरूलाई मनिटोबामा हिमपातको बीचमा खसालिएको र उनीहरूले अर्को कार नदेखेसम्म हिंड्नुपरेको बताएका थिए ।
क्यानडाको मनिटोबा नजिकै अत्यधिक चिसोका कारण पटेल परिवारका चारैजनाको मृत्यु भएको रात माइनस ३५ डिग्री सेल्सियस तापक्रम पुगेको थियो । पटेल परिवार पहिलो पटक २०२२ को जनवरी १२ मा क्यानाडाको टोरन्टो शहरमा विमानबाट पुगेको थियो। त्यसपछि उनीहरु पश्चिमी क्यानडाको मनिटोबामा गएका थिए । जनवरी १८ तिर सीमावर्ती शहर इमर्सनमा गएका थिए । उनीहरुको शव भोलिपल्ट राति भेटिएको थियो ।
क्यानाडा अमेरिका सीमा नजिक इमर्सनमा कुनै पनि सवारीसाधन नभेटिएपछि उनीहरुलाई कसैले कारमा लगेर त्यहाँ छाडिएको थियो । त्यसपछि उनीहरु त्यहाँबाट पैदल हिँडेर अमेरिका छिर्न खोज्दा मृत्यु भएको थियो ।
२०२२ को जनवरी १९ को साँझ अमेरिका छिर्न खोज्ने सात जना भारतीयको अर्को समूहलाई पनि सीमा क्षेत्रमा पक्राउ गरिएको थियो । जसमा दोषी ठहर ४७ वर्षीय स्टिभ सान्ड पनि थिए, उनलाई भ्यानमा १५ जनालाई राखेर सीमा क्षेत्रतिर लैजादै गर्दा मानव तस्करीको आरोपमा पक्राउ गरिएको थियो ।
अमेरिकाको दक्षिणी सिमानाबाट विना भिसा प्रवेश गर्ने घटना सामान्य मानिएपछि उत्तरीक्षेत्रबाट अमेरिका प्रवेशका घटना विरलै हुन्छन् । होमल्याण्ड सेक्युरिटी अधिकारीहरूले पटेल परिवारको मामला र मानव बेचबिखनको ठूलो अभियानको अनुसन्धान गरिरहेको थियो ।