अक्टोबरमा १२ नेपालीलाई अमेरिकाबाट देशनिकालाको आदेश, क्रेडिबल फियर अस्वीकृत हुनेको संख्या बढ्दो
प्रकाशित मिति : मंसिर २, २०८१ आईतबार
गत महिना अर्थात् अक्टोबरमा अमेरिकाको अध्यागमन अदालतबाट १२ जना नेपालीहरुले देशनिकालाको आदेश पाएका छन् । एक्जुकेटिभ अफिस फर इमिग्रेशन रिभ्युको तथ्यांक अनुशार अक्टोबरमा १७६ जना नेपालीका एसाइलम लगायतका मुद्दाको अन्तिम सुनुवाई भएकोमा ५२ जनाको एसाइलम स्वीकृत भएको थियो । ३१ जनाको प्रकृया खारेज गरिएको थियो भने ४३ जनाको एसाइलमका लागि क्रेडिबल फियर नभएको निष्कर्ष निकालिएको थियो ।
अक्टोबर महिनामा ठूलो संख्यामा नेपालीहरुको क्रेडिबल फियर नभएको निष्कर्ष अध्यागमन अदालतले निकालेको हो । सोही महिना २१ जनाको क्रेडिबल फियर भएको निर्धारण गरिएको थियो भने १० जनाको नोटिस टु अपियर नै फाइल गरिएको थिएन । ५ जनाको अन्य प्रकारको केस बन्द गरिएको थियो भने २ जनालाई स्वेच्छिक रुपमा अमेरिका छाड्न आदेश दिइएको थियो ।
गत आर्थिक बर्ष २०२४ मा नेपालीका कुल १४४१ मुद्दाहरुको अध्यागमन अदालतले निर्णय दिएको थियो । जसमध्ये ६०६ जनाको राहत स्वीकृत गरिएको थियो भने ३४६ जनाको प्रकृया खारेज गरिएको थियो । १९७ जनालाई देशनिकालाको आदेश दिइएको थियो भने १४१ जनाको नोटिस टु अपियर फाइल गरिएको थिएन । ६४ जनाको क्रेडिबल फियर नभएको निष्कर्ष निकालिएको थियो भने ३८ जनाको अन्य प्रकारको केस बन्द गरिएको थियो । २७ जनाको क्रेडिबल फियर भएको निष्कर्ष निकालिएको थियो ।
२०२४ को सेप्टेम्बरमामात्र २० जना नेपालीको क्रेडिबल फियर नभएको निष्कर्ष अदालतले निकालेको थियो । उक्त महिना १३७ वटा मुद्दाको अध्यागमन अदालतले निर्णय दिएकोमा ५० जनाको राहत स्वीकृत गरिएको थियो भने २३ जनाको प्रकृया खारेज गरिएको थियो । २० जनालाई देशनिकालाको आदेश दिइएको थियो भने १० जनाको नोटिस टु अपियर नै फाइल नगरेको पाइएको थियो ।
यस अगाडि २०२४ को अगस्तमा २८ जना र जुलाईमा ७ जनाको क्रेडिबल फियर नभएको निष्कर्ष निकालिएको थियो । जुनमा भने ४ जनाको क्रेडिबल फियर नभएको निष्कर्ष निकालिएको थियो भने यो संख्या मे महिनामा पनि ४ नै थियो । अप्रिलमा १ जना नेपालीकोमात्र क्रेडिबल फियर नभएको निष्कर्ष निकालिएको थियो भने मार्चमा ३ र फरबरीमा १ थियो । यो तथ्यांक हेर्दा क्रेडिबल फियर नभएको निष्कर्ष निकालिएका नेपालीका अध्यागमन मुद्दाको संख्या पछिल्लो महिनामा बढ्दो रहेको छ । स्वेदश फर्कन कुनै डर नभएको निष्कर्ष निकालिएको खण्डमा क्रेडिबल फियर नभएको ठहर गरिन्छ ।
अहिलेसम्म १५ हजार ३ सय ६५ जना नेपालीहरुका एसाइलम लगायतका मुद्दाको अध्यागमन अदालतले सुनुवाई गरिसकेको छ, जसमध्ये ७ हजार ५ सय ९५ जनाको राहत स्वीकृत गरिएको थियो भने ३ हजार ४ सय ४९ जनालाई देशनिकालाको आदेश दिइएको थियो । १६२२ जनाको प्रकृया खारेज गरिएको थियो भने ६२९ जनाको मुद्दा अन्य तरिकाले बन्द गरिएको थियो । त्यस्तै ६१० जनालाई स्वेच्छिक रुपमा देश छाड्न आदेश दिइएको थियो भने ४०५ जनाको क्रेडिबल फियर नै नभएको ठहर गरिएको थियो ।
त्यस्तै ३६१ जनाको नोटिस टु अपियर नै फाइल गरिएको थिएन भने २७२ जनालाई प्रोसिक्युटरल डिस्क्रिसन अर्थात् पीडी प्रदान गरिएको थियो । बाइडेन प्रशासनका पालामामात्रै अध्यागमन अदालतबाट देशनिकालाको आदेश पाउने नेपालीहरुको संख्या ६ सय भन्दा बढी रहेको छ । ट्रम्प प्रशासनको पालामा झण्डै ९ सय जना नेपालीहरुले अमेरिकाबाट देशनिकालाको आदेश पाएका थिए ।