जुनमा १७ सय नेपालीलाई अमेरिकाको विद्यार्थी भिसा, चालु आर्थिक बर्षको सबैभन्दा धेरै
प्रकाशित मिति : श्रावण २०, २०८१ आईतबार
जुन २०२४ मा अमेरिकाको विद्यार्थी भिसा पाउने नेपालीहरुको संख्यामा नयाँ रेकर्ड कायम भएको छ । जुनमा १७ सय जना नेपाली विद्यार्थीहरु र ७६ जना उनीहरुका डिपेन्डेन्टहरुले अमेरिकाको भिसा पाएका छन् । यो संख्या चालु आर्थिक बर्षको १० महिनामा सबैभन्दा धेरै हो ।
मे महिनामा सन् २०२४ को जनवरीयताकै सबैभन्दा धेरै १५०८ जना नेपालीहरुले अमेरिकाको विद्यार्थी भिसा पाएका थिए । उनीहरुका ६० जना डिपेन्डेन्टहरुले पनि एफ टु श्रेणीको भिसा पाए ।
जनवरीमा ११०१ जना, फेब्रुअरीमा २०१ जना, मार्चमा ३९५ जना र अप्रिलमा १३९९ जना नेपालीहरुले अमेरिकाको विद्यार्थी भिसा पाएका थिए । अमेरिकाको आर्थिक बर्ष २०२४ को सुरुको ३ महिना अर्थात् सन् २०२३ को अक्टोबर, नोभेम्बर र डिसेम्बरको अवधिमा २८९६ जना नेपालीहरुले अमेरिकाको विद्यार्थी भिसा पाएका थिए । अक्टोबरमा ५०८, नोभेम्बरमा ७८४ र डिसेम्बरमा १६०४ जना नेपालीहरुले अमेरिकाको विद्यार्थी भिसा पाएका थिए । त्यो बाहेक उनीहरुका १११ जना डिपेण्डेटहरुले पनि अमेरिकाको एफ टु श्रेणीको भिसा प्राप्त गरेको अमेरिकी सरकारको विदेश मन्त्रालय, ब्यूरो अफ कन्सुलर अफेयर्सको तथ्यांकमा उल्लेख छ ।
विद्यार्थी भिसा आवेदकलाई ७ कागजातसहित अन्तरवार्तामा आउन अमेरिकी दूतावासको सुझाव
अमेरिकी दूतावास काठमाडौंले विद्यार्थी भिसा आवेदकलाई ७ कागजातसहित अन्तरवार्तामा आउन सुझाव दिएको छ । विद्यार्थी भिसालाई प्राथमिकतामा राखेको दूतावासले विभिन्न ७ कागजातसहित अन्तरवार्तामा आउन सुझाव दिएको हो ।
पासपोर्ट, अप्वाइन्टमेन्ट कन्फर्मेशन, आवेदकले हस्ताक्षर गरेको आई २० फर्म वा डीएस २०१९, सेभिज शुल्क तिरेको रिसिप्ट, पछिल्ला शैक्षिक प्रमाणपत्रहरु, दुईप्रति ६ महिनाभित्रको पासपोर्ट २x२ तस्वीर र डीएस १६० कन्फर्मेशन पेजसहित भिसा अन्तरवार्तामा आउन सुझाव दिइएको छ ।
डिसेम्बरमा अमेरिकाको अध्यागमन सेवा युएससीआईएसले विद्यार्थी भिसाका सम्बन्धमा नयाँ नीति निर्देशन जारी गर्दै वर्क परमिट, स्टाटस परिवर्तन, भिसाको विस्तार र भिसाको पुनस्थापनाबारे विद्यार्थी र उनीहरुका आश्रितहरूका सन्दर्भमा निर्णय गर्न युएससीआईएसको भूमिकाबारे थप स्पष्ट पारेको थियो ।
यसले अन्तर्राष्ट्रिय विद्यार्थीहरू र अमेरिकी शैक्षिक संस्थाहरूलाई योग्यता आवश्यकताहरू, स्कूल स्थानान्तरण, व्यावहारिक प्रशिक्षण र क्याम्पस बाहिर तथा भित्र रोजगारीलगायत धेरै विषयहरूमा स्वागतयोग्य स्पष्टता प्रदान गर्ने युएससीआईएसको भनाई छ । उदाहरणका लागि यो मार्गदर्शनले विदेशी विद्यार्थीहरूको विदेशमा त्याग्न नचाहने स्थायी निवास हुनुपर्ने तर त्यस्ता विद्यार्थीहरू स्थायी श्रम प्रमाणीकरण आवेदन वा आप्रवासी भिसाको लाभार्थी भने हुन सक्ने प्रष्ट पारेको छ ।
स्थायी श्रम प्रमाणीकरण आवेदन वा आप्रवासी भिसाको लाभार्थी हुँदा हुँदै पनि उनीहरुले अमेरिकामा बसाईको अस्थायी अवधि पछि अमेरिकाबाट स्वेदश प्रस्थान गर्ने लक्ष्य रहेको उनीहरुले प्रमाणित गर्न सक्नेछन् ।
थप रूपमा यो मार्गदर्शनले रोजगारदाताले तालिम योजना आवश्यकताहरू पालना गर्दासम्म, ईलेक्ट्रोनिक प्रमाणिकरण राम्रो स्थितिमा रहदासम्म र अमेरिकी कामदारहरूलाई प्रदान गरेसरह ज्याला प्रदान गर्ने लगायतका आवश्यकता पूरा गर्दासम्म विज्ञान, प्रविधि, इन्जिनियरिङ् र गणितका क्षेत्रमा उनीहरूको डिग्रीको आधारमा वैकल्पिक व्यावहारिक प्रशिक्षण ओपीटीको विस्तार खोज्ने विद्यार्थीहरूलाई स्टार्टअप कम्पनीहरूले काममा राख्नसक्नेबारे प्रष्ट पारेको छ ।
एफ वान भिसामा आप्रवासीहरु कलेज, विश्वविद्यालय, सेमिनरी, कन्जर्भेटरी, शैक्षिक हाई स्कूल, प्राथमिक विद्यालय वा अन्य शैक्षिक संस्था वा भाषा सिक्न विद्यार्थीको रूपमा अमेरिका आउन सक्छन् । साथै एम वान भिसामा भाषा प्रशिक्षण कार्यक्रम बाहेक स्थापित व्यावसायिक वा अन्य मान्यता प्राप्त गैर शैक्षिक कार्यक्रमहरूमा सहभागी हुन आउन सकिन्छ ।