अमेरिकाले यही समरदेखि परिष्कृत सुरक्षा विशेषतासहितको नयाँ डिजाइनको भिसा जारी गर्ने
प्रकाशित मिति : श्रावण १, २०८१ मंगलबार
अमेरिकाले यही समरदेखि परिष्कृत सुरक्षा विशेषतासहितको नयाँ डिजाइनको भिसा जारी गर्न सुरु गर्ने भएको छ । यो भिसा सन् २०२२ देखि नै जारी गर्न सुरु गर्ने अमेरिकी सरकारको विदेश मन्त्रालयको योजना भएतापनि नयाँ डिजाइनको भिसा जारी ब्यापक रुपमा हुनमा ढिलाई भएको हो । भिसाको नयाँ डिजाइनमा लिंकनको तस्वीरको ठाउँमा गोल्डेन गेट ब्रिज राखिएको छ ।
पुरानो भिसा स्टीकरको स्टक सकिएपछि हरेक अमेरिकी दूतावास र कन्सुलरहरुले नयाँ डिजाइनको भिसा जारी गर्ने बताइएको थियो । तर कहिलेदेखि भिसा वाहकले आफ्नो पासपोर्टमा नयाँ डिजाइनको भिसा देख्न सुरु गर्नेछन् भन्नेबारे केही बताइएको थिएन । अमेरिकी सरकारले समर २०२४ मा नयाँ डिजाइनको ब्रिज भिसा जारी गर्ने योजना बनाएको अमेरिकी विदेश मन्त्रालयका प्रवक्ताले खसोखासलाई जानकारी दिएका छन् ।
विदेश मन्त्रालयले प्रत्येक दूतावास वा वाणिज्य दूतावासमा उपलब्ध स्टकको आधारमा नयाँ ब्रिज भिसा र लिंकन भिसा एकैसाथ जारी गर्ने प्रवक्ताले जानकारी दिएका छन् । उनलेभ ने यात्रुहरूले यस समरमा आफ्नो पासपोर्टमा नयाँ ब्रिज भिसा फोइल देख्ने आशा गर्न सक्छन्। हाम्रा विदेशी दूतावास र कन्सुलेटहरुले नयाँ ब्रिज भिसा फोइलहरू छाप्न सुरु गर्नु अघि हालको भिसा फोइलहरूको स्टकहरू समाप्त गर्नेछन्।
अमेरिकी विदेश मन्त्रालय अन्तर्राष्ट्रिय यात्रालाई सहज बनाउने र सीमा सुरक्षा सुदृढ गर्ने सुरक्षित भिसा जारी गर्न प्रतिबद्ध रहेको उनको भनाई छ । नयाँ भिसा स्टीकरमा इन्टाग्लियो माइक्रोटेक्स्ट, मेसिनले पढ्न योग्य क्षेत्रमा ब्लाइन्ड इम्बोसिङ, बहुरंगी अल्ट्राभायोलेट फाइबर, धेरै अल्ट्राभायोलेट छविहरू र एक अल्ट्राभायोलेट सीरियल नम्बर लगायत परिष्कृत सुरक्षा विशेषताहरु समावेश गरिएको उनले जनाएका छन् ।
यद्यपी पूरानो डिजाइनको भिसा छ भने पनि उक्त भिसामा उल्लेखित अवधिसम्म उक्त भिसा काम लाग्ने र आवतजावत गर्न सकिने यस अगाडि सीबीपीले प्रष्ट पारेको थियो । आफूसँग पूरानै डिजाइनको भिसा भएकाहरुले कुनै कदम चाल्नुपर्नेछैन । उनीहरुले भिसा अवधि बाँकी रहँदासम्म पूरानै डिजाइनको भिसा प्रयोग गर्न सक्नेछन् । पूरानो भिसा अद्यावधिक भएसम्म उनीहरुले नयाँ डिजाइनको भिसा लिन आवश्यक पर्नेछैन ।
नयाँ भिसामा सान फ्रान्सिस्को चर्चित गोल्डेन गेट ब्रिज मुख्य रूपमा रहेको छ। भिसा डिजाइनमा परिमार्जनले फेरबदल र नक्कली गर्न अझ गाह्रो बनाउने अधिकारीहरूले बताएका छन् । सामान्यतया आवेदकहरूले कन्सुलर अन्तर्वार्ता सफलतापूर्वक पास गरेपछि अमेरिकी भिसाहरू जारी गरिन्छ र विदेशी राहदानीहरूमा स्टीकर लगाइन्छ।