२३ हजार ४३ नेपाली विद्यार्थीहरु अमेरिकामा अध्ययनरत
प्रकाशित मिति : जेष्ठ १२, २०८१ शनिबार
अमेरिकी सरकारकाको डिपार्टमेन्ट अफ होमल्याण्ड सेक्युरिटीले २३ हजार ४३ नेपाली विद्यार्थीहरु अमेरिकामा अध्ययनरत रहेको तथ्यांक सार्वजनिक गरेको छ । सेभिजबाट निकालिएको यो तथ्यांक अनुशार अमेरिकामा अध्ययनरत नेपालीहरु विश्वका अन्यदेशबाट आएका विद्यार्थीहरुको सुचीमा १३ नम्बरमा रहेका छन् ।
अमेरिका सबैभन्दा धेरै भारतीयहरु अध्ययनरत रहेका छन् भने दोश्रोमा चाइनिज रहेका छन् । तेश्रोमा कोरियन, चौथोमा क्यानेडियन, पाँचौंमा ब्राजिलियन, छैठौंमा भियतनामी, सातौंमा जापानी, आठौंमा ताइवानी, नवौंमा नाइजेरियन, दशौंमा मेक्सिकन रहेका छन् । एघारौंमा बंगलादेशी र बाह्रौंमा कोलम्बियनपछि तेह्रौंमा नेपालीहरु रहेका छन् ।
२०२२ मा अमेरिकामा अध्ययनरत विद्यार्थीहरुको संख्या २० हजार ३ सय ४४ रहेकोमा २०२३ मा यो संख्यामा बृद्धि देखिएको हो । यो संख्या विभिन्न बर्षहरुमा विद्यार्थी भिसामा अमेरिका आएर वा अमेरिकामा आएर विद्यार्थी भिसामा स्टाटस परिवर्तन गरेर अमेरिकाका विभिन्न कलेज र युनिभर्सिटीहरुमा अध्ययनरत नेपाली विद्यार्थीहरुको संख्या हो ।
२०२३ को सेभिज रेकर्ड अनुशार स्टीम ओपीटीमा सहभागी हुनका लागि स्वीकृत प्रदान गरिएका नेपाली विद्यार्थीहरुको संख्या ३४१६ रहेको छ । स्टीम ओपिटीमा सहभागी हुन स्वीकृत अन्तर्राष्ट्रिय विद्यार्थीहरुमा पहिलोमा भारतीय, दोश्रोमा चाइनिज, तेश्रोमा कोरियन र चौथोमा नेपालीहरु रहेका छन् । विज्ञान, प्रविधि, इन्जिनियरिङ वा गणितमा स्नातक डिग्री लिएर अमेरिकामा काम खोज्न वर्क परमिट पाएका अन्तर्राष्ट्रिय विद्यार्थीहरु स्टीम ओपीटी वाहक हुन् ।
आर्थिक बर्ष २०२३ मा ६ हजार २ सय ३ जना नेपालीहरु विद्यार्थी भिसामा अमेरिका आएको तथ्यांक डिपार्टमेन्ट अफ स्टेटको ब्यूरो अफ कन्सुलर अफेयर्ससँग रहेको छ । यो संख्या २०२२ मा ६ हजार ७ सय ८० थियो भने २०२१ मा ३ हजार ४ सय ५३ रहेको थियो । यसमा अमेरिकामा आइसकेपछि स्टाटस परिवर्तन गर्नेहरुको संख्या समावेश छैन ।
डिपार्टमेन्ट अफ होमल्याण्ड सेक्युरिटीको तथ्यांक अनुशार अमेरिकामा विभिन्न बर्षमा विद्यार्थी भिसामा आएका ४०८३ जनाले अमेरिका छाड्ने अपेक्षा गरिएको थियो । तर त्यसमध्ये ३७ जनाले भिसा ओभरस्टे भइसकेपछिमात्र अमेरिका छाडे भने ६४३ जना अमेरिकाभित्रै ओभरस्टे भए । बाँकीले या त भिसा ओभरस्टे हुनु अगाडि अमेरिका छाडे, या त अमेरिकामा नै अध्यागमन स्टाटस थप, विस्तार, परिवर्तन गरे ।